(ඉන්දිකා රාමනායක)

කොරෝනා වයිරස ලක්ෂණ මතුව ඇති බව දැන දැන හෘද රෝගයක් බව පවසමින් රාගම රෝහලට ඇතුළත්ව සිටි පුද්ගලයාට එරෙහිව වත්තල මහේස්ත්‍රාත් අධිකරණයට කරුණු වාර්තා කළ බව නීති කොට්ඨාසය භාර නියෝජ්‍ය පොලිස්පති අජිත් රෝහණ මහතා පැවසීය. 

මෙම පුද්ගලයා ඉතාලියේ සිට පැමිණි අයකු බවට රෝහලට නොපවසා හෘද රෝගී තත්ත්වයක් හේතුවෙන් රෝහල්ගත වී ඇති බව පැවසේ.

තමාට කොරෝනා වයිරස රෝගී ලක්ෂණ ඇති බව දැන දැනම ඉහත පුද්ගලයා චේතනාන්විතව සිදු කළ මෙම ක්‍රියාව හේතුවෙන් ඔහුට   ප්‍රතිකාර කළ රාගම රෝහලේ වෛද්‍ය හා කාර්ය මණ්ඩලය අවදානමට  පත්ව ඇති බව අජිත් රෝහණ මහතා සඳහන් කළේ ය.  

ඔහුට ප්‍රතිකාර කළ වෙද්‍ය්‍ය හා  කාර්ය මණ්ඩලය නිරෝධායන කටයුතු සඳහා යොමු කර ඇති බව ද අජිත් රෝහණ මහතා කියා සිටියේය. 

මෙම සිද්ධියේ දී පුද්ගලයා නේවාසිකව ප්‍රතිකාර ලබමින් සිටි වාට්ටුවේ සිටි සෙසු සාමාන්‍ය රෝගීන්ද අවදානම ලක්ව ඇති බවද හෙතෙම කියා සිටියේය.

මෙම පුද්ගලයාට අමතරව ඔහුගේ  මෙම ක්‍රියාවට සඳහා ආධාර අනුබල දුන් පුද්ගලයන්ට ද නීතිය ක්‍රියාත්මක කරන බවද අජිත් රෝහණ මහතා කියා සිටියේ ය .

මෙම සිද්ධිය ඉතාමත් කනගාටුදායක තත්ත්වයක් බව ද හෙතෙම අවධාරණය කළේය .