(හර්ෂණ තුෂාර සිල්වා)

මෙරට සයිබර් ආරක්ෂාව පිළිබඳ ප්‍රතිපත්ති නැවත වරක් විමසා බැලිය යුතු යැයි යුද හමුදාපති ලුතිනන් ජෙනරාල් මහේෂ් සේනානායක මහතා අද (28) පැවැසීය.

‘සයිබර් අවකාශය : අනාගතය උදෙසා සදාතනික යුද භූමියක්’ යන තේමාව යටතේ කොළඹ බණ්ඩාරනායක ජාත්‍යන්තර අනුස්මරණ සම්මන්ත්‍රණ ශාලාවේ පැවැති සයිබර් ආරක්ෂාව පිළිබඳ සමුළුවේ ආරම්භක සැසිය අමතමින් යුද හමුදාපති ලුතිනන් ජෙනරාල් මහේෂ් සේනානායක මහතා එම කරුණු සඳහන් කළේය.

එහිදි අදහස් දැක්වූ යුද හමුදාපතිවරයා මෙසේ ද කීය. 

 “සයිබර් තර්ජන ඕනෑම තැනකින් නිර්මාණය වෙනවා. ඕනෑම වෙලාවක පැමිණෙන් පුළුවන්. එහෙත් සෑම අවස්ථාවකදීම එම තර්ජන පැමිණෙන්නේ පිටතින්. මේ තර්ජනවලට මුහුණ දීම සඳහා ආරක්ෂක අංශ මෙන්ම සිවිල් ප්‍රජාව, හමුදාවෙන් පිටස්තර පාර්ශව ද සහයෝගයෙන් කටයුතු කළ යුතුයි.

සයිබර් ආරක්ෂාව රටක ආර්ථිකයට, සංචාරක ක්ෂේත්‍රයට ආදී ඕනෑම ක්ෂේත්‍රයකට බලපෑම් කරනවා. 

අපේ සයිබර් ආරක්ෂක ප්‍රතිපත්ති නැවත විමසා බැලිය යුතුයි. එම ප්‍රතිපත්ති පිළිබඳව විමසා බැලීමක් කළ යුතුයි. අපි අපේ විද්‍යුත් හා ඉලෙක්ට්‍රොනික පද්ධති සහ ජාල සුරක්ෂිත කළ යුතුයි. අපි ආරක්ෂක අංශ අතර පමණක් නොව සයිබර් ජාලය තුළ සිටින සියලු පාර්ශව සමඟ දත්ත සහ තොරතුරු බෙදාහදා ගත යුතුයි. සහයෝගීත්වයෙන් වැඩකළ යුතුයි. ශ්‍රී ලංකා යුද හමුදාවට සයිබර් ආරක්ෂාව පවත්වාගෙන යෑමට හැකියාව ලැබෙන්නේ එවිටයි”