මෙරට ප්‍රථම විදුලි සංදේශ යටිතල පහසුකම් සේවා බලපත්‍රය EDOTCO ආයතනයට

භානුක අමරසිංහ

වසර 2028 වන විට ශ්‍රී ලංකාවේ 5ඨ අපේක්ෂාව සහ දත්ත භාවිතය සිව් ගුණයකින් වැඩි කිරීමේ සැලසුම් සඳහා අවශ්‍ය යටිතල පහසුකම් පරතරය පියවීමට නම් රට තුළ තවත් අමතර සන්නිවේදන කුලුනු 7,000 කට වඩා පිහිටුවීමේ අවශ්‍යතාවක් පවතින බව EDOTCO Services Lanka (Private) Limited හි කළමනාකාර අධ්‍යක්ෂ ගයාන් කෝරලගේ මහතා පවසයි.
ශ්‍රී ලංකා විදුලි සංදේශ නියාමන කොමිෂන් සභාව විසින් මෙරට පළමු විදුලි සංදේශ යටිතල පහසුකම් සේවා බලපත්‍රය ආසියාවේ ප්‍රමුඛතම ඒකාබද්ධ විදුලි සංදේශ යටිතල පහසුකම් සමාගමක් වන EDOTCO සමූහය වෙත පිරිනැමීමේ අවස්ථාවේදී අදහස් දක්වමින් ඒ මහතා මේ බව සඳහන් කළේය.
එම සමූහයට අනුබද්ධිත සමාගමක් ලෙස EDOTCO Services Lanka (Private) Limited ආයතනය වෙත මෙම බලපත්‍රය පිරිනැමීම සිදු විය. ඩිජිටල් ආර්ථික නියෝජ්‍ය අමාත්‍ය එරංග වීරරත්න මහතාගේ ප්‍රධානත්වයෙන් සංවිධානය වූ මෙම අවස්ථාව සඳහා ශ්‍රී ලංකා විදුලි සංදේශ නියාමන කොමිෂන් සභාවේ අධ්‍යක්ෂක ජනරාල්, විශ්‍රාමික එයාර් වයිස් මාෂල් බන්දුල හේරත්, ජනාධිපතිවරයාගේ ඩිජිටල් ආර්ථිකය පිළිබඳ ප්‍රධාන උපදේශක ආචාර්ය හාන්ස් විජේසූරිය මහතා ඇතුළු පිරිසක් සහභාගි වී සිටියහ. 
මෙලෙස රජය විසින් ස්වාධීන, මධ්‍යස්ථ-කුලුනු සමාගම් හි සහාය ලබාගැනීමත් සමග එය ශ්‍රී ලංකාවේ විදුලි සංදේශ අංශයේ ඓතිහාසික වෙනසක් සනිටුහන් කරනු ඇතැයි රජය පවසයි. මේ හරහා සම්බන්ධතා ව්‍යාප්තිය වේගවත් කිරීම, යටිතල පහසුකම් බෙදාගැනීම, වැඩිදියුණු කිරීම සහ රට පුරා සියලු‍ දෙනා ආවරණය වන ලෙස ඩිජිටල් ප්‍රවේශය පුළුල් කිරීම රජයේ අපේක්ෂාව වී තිබේ.
“මෙම මුලපිරීම යටිතල පහසුකම් අනුපිටපත්වීම අවම කිරීම, එක් එක් ක්‍රියාකරුට වෙනම කුලු‍නු තැනීමේ අවශ්‍යතාව අඩු කිරීම අරමුණයි. මෙය මූල්‍ය හා භූගෝලීය සම්පත් කළමනාකරණය කිරීම පමණක් නොව පාරිසරික තිරසාරභාවටද හේතු වේවි.” රජය පවසයි.
මෙලෙස බෙදාගත් යටිතල පහසුකම් කුලුනු ඉදිකිරීමේදී අදාළ සමාගම් වෙත ප්‍රතිලාභ හිමි වන බවත්, එමගින් පාරිභෝගිකයන් සඳහා වන සම්බන්ධතාවේ පිරිවැය අඩුවීමත් අපේක්ෂාවයි. එසේම සම්පත් කාර්යක්ෂමව භාවිත කිරීම සහ අඩු සේවා සහ සේවා නොලබන ප්‍රදේශවලට සේවා සැපයීම සඳහා සේවා සම්පාදයකයන්ට අවස්ථාව හිමි වනු ඇතැයිද රජය සඳහන් කරයි.