ශ්‍රී ලංකාවේ ක්‍රියාත්මක තේ ආශ්‍රිත සංචාරක ව්‍යාපාරය වෙත යුරෝපයේ ජනතාව අතර ඉහළ උනන්දුවක් පවතින බව විදේශ කටයුතු අමාත්‍යාංශය පවසයි. පසුගියදා බෙල්ජියමේ බ්‍රසල්ස් නුවරදී පැවැත්වුණු බ්‍රසල්ස් තේ උළෙල 2025 වෙත පැමිණි 700 කට අධික යුරෝපියානු තේ රසවතුන්ගෙන් එය මනාව පැහැදිලි වූ බව එම අමාත්‍යාංශය සඳහන් කරයි. 

ශ්‍රී ලංකාව නියෝජනය කරමින් උසස් මට්ටමේ සිලෝන් තේ අලෙවි කරන සමාගම් රැසක්ම මෙම අවස්ථාවට සහභාගි වී තිබේ. ශ්‍රී ලංකා තේ මණ්ඩලයේ සහයෝගිතාවෙන් බ්‍රසල්ස්හි ශ්‍රී ලංකා තානාපති කාර්යාලය මෙම අවස්ථාවට එක්ව තිබේ. විශේෂයෙන්ම අද වනවිට බාල සහ තරුණ වයසේ පසුවන යුරෝපා ජාතිකයන් අතර කෝපි පානයට වඩා තේ පානයට වැඩි කැමැත්තක් පවතින බවද මෙහිදී හඳුනාගෙන තිබේ. 

මේ අතර ශ්‍රී ලංකාව තුළ උසස් තේ නිෂ්පාදනය කරන ආකාරය දැකබලා ගැනීම සඳහා මෙරටට සංචාරය කිරීමටද එම පිරිස් තුළ දැඩි උනන්දුවක් පැවති බවත් සඳහන් වෙයි. ඒ අනුව ශ්‍රී ලංකාවේ වඩාත් පුළුල් සංචාරක කර්මාන්තය තුළ තවත් ආකර්ෂණීය අවස්ථාවක් ලෙස මෙම තේ සංචාරක කර්මාන්තය තවදුරටත් දියුණු කළ හැකි බවත් විදේශ කටයුතු අමාත්‍යාංශය සඳහන් කරයි.