විමුක්ති එස් රුද්‍රිගු

තායිලන්තය හා කාම්බෝජය අතර ඇතිවූ දරුණු දේශසීමා ගැටුම් හේතුවෙන් තායිලන්තයේ සේවය කළ කාම්බෝජ විදේශ ශ්‍රමිකයන් නැවතත් සිය රට බලා පිටත්ව යෑම හේතුවෙන් ඇතිවූ ශ්‍රම හිඟයට පිළිතුරු ලෙස ශ්‍රී ලංකාවේ ශ්‍රමිකයන් 10,000 ක් සඳහා රැකියා අවස්ථා ලබාදීමට තායිලන්ත කැබිනට් මණ්ඩලය අවසරය ලබාදුන් බව එරට ජ්‍යෙෂ්ඨ නිලධාරියෙක් පෙරේදා (19) ප්‍රකාශ කළේය.
තායිලන්තයේ වයස්ගත ජනගහනය වැඩිවීම සහ පහළ යන ශ්‍රම බළකා සහභාගීත්වය හේතුවෙන් එරට කෘෂිකර්මාන්තය, ඉදිකිරීම් සහ නිෂ්පාදන අංශවලට අවම වශයෙන් ලියාපදිංචි විදේශීය ශ්‍රමිකයන් ලක්ෂ 30 ක් පමණ මත යැපීමට සිදුවී ඇති බව ජාත්‍යන්තර කම්කරු සංවිධානයේ දත්ත අනාවරණය කළේය.
ශ්‍රී ලාංකිකයන් 30,000 ක් පමණ තායිලන්තයේ රැකියා සඳහා පැමිණීමට ලියාපදිංචි වී සිටින බවත් මුල් අදියර යටතේ ශ්‍රී ලාංකිකයන් 10,000 තායිලන්තයේ රැකියා අවස්ථා සඳහා පැමිණෙනු ඇති බවත් එරට කම්කරු අමාත්‍යවරයා පෙරේදා (19) ප්‍රකාශ කළේය.
ඇතිවූ දේශ සීමා සටන් හේතුවෙන් දෙරටේ පුද්ගලයන් 43 ක් මියගොස් තවත් ලක්ෂ 3 ක පමණ පිරිසක් අවතැන් විය. ගැටුම් ආරම්භ වීමට පෙර කාම්බෝජ වැසියෝ ලක්ෂ 5 ක පමණ පිරිසක් තායිලන්තයේ සේවය කළහ.