කොටස් වෙළෙඳාම තියුණු වර්ධනයක් සිදුවුවහොත් අද දිනයේ ගනුදෙනු අවසන් වන පසු සියලු කොටස් මිල දර්ශකය ඒකක 17,000 ඉක්මන අවස්ථාවක් දැකගත හැකි වනු ඇත. ඊයේ (22) ගනුදෙනු අවසානයේ දී එම සීමාවට දර්ශක 142 ක් මෙපිටින් නතර වූ අතර, දිනයේ වර්ධනය ඒකක 218 ඉක්මවා තිබීම තුළ අද ගනුදෙනු කෙරෙහි අපේක්ෂා සහගත විය හැකිය. 
මෙම සීමාව සලකුණු කළහොත් වෙළඳපොළ ගනුදෙනු දින හතරක් තුළ සියලු කොටස් මිල දර්ශකය ඒකක දහසය දහසක සිට දහ හත් දහස දක්වා තවත් වාර්තාගත ආකාරයකින් වර්ධනය වූ බව සනිටුහන්වීමට බොහෝ දුරට ඉඩ තිබේ.
මිලදී ගැනීමට යුහුසුළුවන ස්වභාවයක් සහිතව ඊයේ කොටස් වෙළඳ පොළ ගනුදෙනු ඇරඹුන අතර, අවසන් පැයක පමණ කාලය තුළ විකිණීම් බහුල වූ ආකාරයක් පෙනී ගියේය. සියලු කොටස් මිල දර්ශකය 16,816.84 ක් වශයෙන් වූ අතර, එය කලින් දිනයට සාපේක්ෂව දර්ශක 219.68 ක වර්ධනයකි. එස් ඇන්ඩී පී ශ්‍රී ලංකා දර්ශකය 5,138.66 ක් වශයෙන් අවසන් වූ අතර, එය දර්ශක 91.21 ක ඉහළ යාමක් සේ දැක්විය හැකිය. 
සිංගර් ෆිනෑන්ස් සහ සතොස මෝටර්ස් යන සමාගම් සිය මුල්‍ය වාර්තා විනිමය හා සුරුකුම් කොමිසමට ඉදිරිපත් කරන ලද අතර, ඒවා ගනුදෙනුකරුවන් සඳහා ප්‍රසිද්ධ කොට තිබේ. 
සිංගර් ෆිනෑන්ස් සමාගමේ කොටසක් රුපියල් 27.80 තෙක් ශත විස්සකින් මිල අඩු වූ අතර, එය ඉදිරියේ දී ලාභාංශ අනුව මිල පහත වැටෙනු ඇතැයි සැලයෙන් සිදුවූ විකිණීම් හේතුකොටගෙන බව පෙනේ. කෙසේ වෙතත් මෙම සමාගමේ කොටසක් රුපියල් 42.00 දක්වා පසුගිය කාලයේ දී ඉහළ ගොස් තිබුණි. සතොස මෝටර්ස් කොටසක මිල රුපියල්  31.90 තෙක් රුපියලකින් මිල ඉහළ ගියේය.
බැංකු ආශ්‍රිත සමාගම්වල කොටස් කෙරෙහි ආයෝජකයන්ගේ උනන්දුව තවදුරටත් පැවැතිණ. දිනයේ පිරිවැටුම රුපියල්  බිලියන 10.316 වූ අතර, දිනය අවසානයේදී ගනුදෙනු 44,690 ක් සිදුවී තිබේ. ලැයිස්තුගත සමාගම් 149 ක් ක කොටස් මිල ඉහළ ගියේය. සමාගම් 90 ක කොටස් මිල පහත වැටිණි. 
එස්.එම්.බී. ලීසිං, ඉන්ඩ්‍රම්ට්‍රියල් ඇසෙස්ට්, ඇම්බියන්ස් හෝලිඩිං, ටල් ලංකා හොටෙල්, එන්.ටී.බී. බ්‍රවුන්ස් ඉන්වස්ටමන් සහ ගෙස්ටෙට්නර් යන සමාගම්වල කොටස් වැඩිම ප්‍රතිශතයකින් ඉහළ ගියේය. 
ඒ.එෆ්.එෆ්, මැක්වුඩ්ස්, ඊ චැනලිං, සිලෝක් බෙවරේජස්, යුනයිටඩ් මෝටර්ස්, ඩයලොග්, ඔනාලි සහ ද කිංග්ස්බරි යන සමාගම්වල කොටස් මිල ඉහළම ප්‍රතිශතයකින් පහතට වැටුණු බව දැක්වේ.
බ්‍රවුන්ස් ඉන්වෙස්ට්මන් රු. මිලියන 962 ක කොටස් හුවමාරු වූ අතර, එය පිරිවැටුමට වැඩිම දායකත්වයක් දැක්වීය. හැටන් නැෂනල් බැංකුව රුපියල්  මිලියන 909 ක්, එල්.ඕ.එල්.සී. රුපියල්  මිලියන 466 ක්, ජෝන් කීල්ස් රුපියල්  මිලියන 412 ක් හා එන්.ඩී.බී. රුපියල්  මිලියන 373 ක් වශයෙන් ක්, සම්පත් දිනයේ පිරිවැටුමට වැඩිම දායකත්වයක් දක්වන ලද සෙසු සමාගම් අතර ඉදිරියෙන් සිටි බව සඳහන් කළ හැකිය.
විදේශ ගනුදෙනු ප්‍රමාණාත්මකව ඉහළ නමුත් තවමත් විකිණීමේ ප්‍රවණතාව ඇත. විදේශ මිල දී ගැනීම් සීමිතය. විනිමය අනුපාතිකය හා ලබාගත හැකි කොටස් සීමාව මෙයට බලපා ඇති බව පෙනේ.
නිරීක්ෂක