විමුක්ති එස් රුද්‍රිගු

කොතලාවල ආරක්ෂක විශ්වවිද්‍යාලයේ වෛද්‍ය උපාධිය සඳහා විශ්වවිද්‍යාල සුදුසුකම්ලත් සිසුන් පමණක් ඇතුළත් කරගැනීමට රජය ගත් තීරණය හේතුවෙන් එම විශ්වවිද්‍යාලයට රුපියල් බිලියන දෙකක පමණ මුදලක් අහිමිවී ඇතැයි පැවැසෙයි.

පසුගිය වසරේ පැවැත්වූ අධ්‍යාපන පොදු සහතික පත්‍ර උසස් පෙළ විභාගය සමත්වී විශ්වවිද්‍යාල සුදුසුකම් නොලැබූ සිසුන් කොතලාවල ආරක්ෂක විශ්වවිද්‍යාලයේ වෛද්‍ය උපාධියට බඳවා නොගැනීමට රජය පසුගියදා තීරණය කළේය. එම තීරණය මීට  බඳවා ගත් සුදුසුකම් තිබෙන සිසුන් විශාල පිරිසකගේ නොසතුටට හේතු විය.

කොතලාවල ආරක්ෂක විශ්වවිද්‍යාලය විසින් විවිධ උපාධි වැඩසටහන් සඳහා ශිෂ්‍ය භට නිලධාරීන් මෙන්ම මුදල් ගෙවීමේ පදනම මත සිසුන් බඳවා ගනු ලබයි. 2023 සහ 2024 වසරවලදී එලෙස වෛද්‍ය උපාධිය සඳහා සිසුසිසුවියන් 120 දෙනකු බඳවා ගෙන තිබූ අතර වසර 5 සඳහා ඔවුන්ගෙන් අයකළ ගෙවීම පිළිවෙළින් රුපියල් මිලියන 12.5 සහ මිලියන 15 ක් විය.

මෙවර උසස් පෙළ නිකුත් වීමෙන් පසුව පසුගිය 21 වැනිදා වෛද්‍ය උපාධිය සඳහා කොතලාවල ආරක්ෂක විශ්වවිද්‍යාලය අයැදුම්පත්‍ර වෙබ් අඩවිය ඔස්සේ කැඳවූ අතර මෙවර විශ්වවිද්‍යාල සුදුසුකම් ලැබූ සිසුසිසුවියන්ගේ අයැදුම්පත්‍ර පමණක් බාර ගන්නා බව එහි සඳහන් විණි. එසේම වසර 5 ක කාලය සඳහා ගාස්තුව රුපියල් මිලියන 17.5 ක් දක්වා ඉහළ දමා තිබිණි.

කෙසේ වෙතත්, දැන්වීමෙන් පැය කිහිපයක් ඇතුළත, ආරක්ෂක නියෝජ්‍ය අමාත්‍ය අරුණ ජයසේකර පාර්ලිමේන්තුවේදී ප්‍රකාශ කර සිටියේ රජය මෙම වසරේ උසස් පෙළ සුදුසුකම් ලත් දේශීය සිසුන් කොතලාවල ආරක්ෂක විශ්වවිද්‍යාලයට බඳවා නොගන්නා බවයි.