මේ වසරේ ජනවාරි සිට අගෝස්තු දක්වා මුල් මාස අටක කාලය තුළ මෙරට පොල් ආශ්‍රිත නිෂ්පාදන අපනයනයේ ආදායම එක්සත් ජනපද ඩොලර් මිලියන 786.64ක් ලෙස සටහන්ව තිබේ. මෙය 2024 වසරේ එම කාලසීමාවේදී හිමි වූ ඩොලර් මිලියන 569.81 ක ආදායම හා සැසඳීමේදී සියයට 38.05ක වර්ධනයක් බව අපනයන සංවර්ධන මණ්ඩලය සඳහන් කරයි. 

මෙහිදී අගෝස්තු මාසයේදී පොල් ආශ්‍රිත නිෂ්පාදන අපනයනයෙන් හිමිකරගත් ඩොලර් මිලියන 126.05ක ආදායමත් ඊට කැපීපෙනෙන ලෙස දායක වී තිබේ. එය 2024 අගෝස්තු මාසයේ වාර්තා කළ ඩොලර් මිලියන 88.77 හා සැසඳීමේදී සියයට 42ක වර්ධනයකි.

මේ අතර 2024 වසරේ මුල් මාස අටට සාපේක්ෂව 2025 වසරේ මුල් මාස අට තුළදී පොල්තෙල් අපනයනය සියයට 75.8 කින්ද, දිසිදි පොල් අපනයනය සියයට 34.6 කින්ද, පොල් කිරිපිටි අපනයනය සියයට 74.14 කින්ද, පොල් ක්‍රීම් සියයට 74.07 කින්ද, දියරමය පොල්කිරි සියයට 42.18 කින්ද, කොහුබත් සියයට 22.65 කින්ද, සක්‍රිය කාබන් සියයට 23.05 කින්ද ලෙස අපනයන ආදායම් ඉහළ ගොස් තිබේ.