මල්වත්ත පාර යනු පිටකොටුවේ වීදිවලින් එක්තරා ආරම්භයක් සනිටුහන් කරන වීදීයකි. සමහරු සිතන්නේ පිටකොටුවෙන් මල් මිලදී ගත හැක්කේ මල්වත්ත පාරෙන් කියාය. අද මල් නැතත් එදා මල්වත්තකින් මල්වත්ත පාර සුන්දර විය. ඉංග්‍රීසින් රට පාලනය කරන සමයෙහි අලංකාර මල්ගොමුවලින් පිරි ප්‍රභූ නිවාස සංකීර්ණවලින් සමන්විතව තිබූ මේ මල්වත්ත පාරේ එදා තිබුණා යැයි කියූ කිසිදු සාක්ෂියක් අද දක්නට නැත.

 වර්තමානය වන විට මල්වත්ත පාරේ ඇසගැටෙන සුලබ දසුන වන්නේ නොයෙක් වර්ගයේ පාසල් බෑග්, ට්‍රැවලින් බෑග්, විවිධ වර්ගයේ සපත්තු හා නානා මාදිලියේ ඔරලෝසු වෙළෙඳසල්ය. මේ ද්‍රව්‍යවලට මල්වත්ත පාර අද වෙන් වී ඇතත් කාලයක්ම පරපුරක් නැළවූ කැසට් පටයට ද මේ වීදිය නම් දැරුවේය. කලක් මේ වීදිය ගීත රසිකයන්ගේ කැසට් වීදිය විය. මේ දිනවල බිස්නස්වල තතු සෙවීමට අප ළඟා වූයේ මල්වත්ත පාරේ පිහිටි හිල්මා ට්‍රේඩර්ස් වෙතය. එහි හිමිකරු වූ තුවාන් රසිකගේ මහතා අප හා අදහස් බෙදා ගත්තේ මෙලෙසිනි.

Q මේ දිනවල බිස්නස් කොහොමද?

මේ දිනවල බිස්නස් ගැන කතා කරනවා නම් බිස්නස්වල අඩු වැඩියක් හරියට කියන්න බෑ. බිස්නස් අඩු වෙනවා ආපහු වැඩි වෙනවා ඒක තමයි බිස්නස්වල ස්වභාවය. උදේට බිස්නස් තිබ්බොත් හවසට නෑ. හවස තිබ්බොත් උදේට නෑ. කොහොමත් දවල් 3න් පස්සේ බිස්නස් අඩුයි. අායේ හවස 5න් පස්සෙ තමයි බිස්නස් කරගන්න පුළුවන්. උදේ වරුව ගත්තාම දවල් 12 වගේ වෙනකන් බිස්නස් ඇත්තෙම නෑ. සෙනසුරාදා ඉරිදා දවස්වලට සතියේ අනෙක් දවස්වලට වඩා බිස්නස් තියනවා.

Q බිස්නස් මේ තත්වයට පත්වීමට බලපෑ හේතු මොනවාද?

මම මේ බිස්නස් එක පටන් ගත්තේ කොරෝනා වසංගතයෙන් පස්සේ. ඒ කාලේ ඉඳලම හරි හෙමින් තමයි බිස්නස් එක කෙරීගෙන යන්නේ. ඇත්තටම බිස්නස් අඩු වෙන්න බලපාන හේතුව තමයි මිනිසුන්ට සල්ලි නෑ. පවතින ආර්ථික රටාව එක්ක හිතේ හැටියට වියදම් කරන්න බෑ. පිටකොටුව වුණාට සෙනග නෑ. පාරිභෝගිකයන්ට දොස් කියන්න බෑ. මොකද මිනිස්සු අමරුවෙන් ජීවත් වෙන්නේ. බෑග් මිල ගත්තාම මිලේ ලොකු වැඩියකුත් නෑ. විවිධ මිල ගණන්වලට තියනවා. ඒකත් පාරිභෝගිකයන්ට පහසුවක්. මොකද තමන්ට සරිලන මුදලකට මිලදී ගන්න පුළුවන් නිසා. 

ශෂිකා අබේරත්න

ඡායාරූප: ඉසුරු පෙරේරා