විමුක්ති එස් රුද්‍රිගු

සූර්ය බලශක්තිය සඳහා වන බැටරි සඳහා ආනයනය කරන අවස්ථාවේදී සියයට 46 ක බද්දක් පැනවෙන බැවින් අනෙකුත් රටවලට සාපේක්ෂව ශ්‍රී ලංකාවේ ඒවා මිල අධික බව පුනර්ජනනීය බලශක්ති පාර්ශ්වකරුවෝ පවසති.
බැටරියක් සහිත වහල මත සවිකරන සූර්ය පැනල් පද්ධති මගින් උත්පාදනය කර රාත්‍රී 6.30 ත් 10.30 ත් අතර ජාතික විදුලිබල පද්ධතියට මුදා හරින විදුලි ඒකකයක් සඳහා ගෙවනු ලබන ගාස්තුව රුපියල් 27 සිට රුපියල් 45.80 දක්වා ඉහළ දමන බව ලංකා විදුලිබල මණ්ඩලය පසුගියදා නිවේදනය කළේය.
එහෙත් ඒකකයට ලැබෙන මිල ඉහළ දැමුවත් බැටරි සඳහා වැයකිරීමට සිදුවන ප්‍රාග්ධන වියදම කෘතිමව ඉහළ දමා ඇතැයි පුනර්ජනනීය බලශක්ති සංවර්ධකයන්ගේ සම්මේලනය ප්‍රකාශ කළේය. බැටරියක් ආනයනය කිරීමේදී ගෙවීමට සිදුවන එකතු කළ අගය මත බද්ද නැවත ලබා ගැනීමට හැකියාවක් නොමැති බවද එම සම්මේලනය පෙන්වා දුන්නේය.
එවන් පසුබිම බැටරියක් සහිත වහල මත සවිකරන සූර්ය පැනල් පද්ධති සඳහා ලංකා විදුලි බල මණ්ඩලය ලබා දෙන්නේ වසර 10 ක විදුලිය මිලදී ගැනීමේ ගිවිසුමක් බවත් එය කිසිසේත් ප්‍රමාණවත් නොමැති බවත් පුනර්ජනනීය බලශක්ති සංවර්ධකයන්ගේ සම්මේලනය ප්‍රකාශ කළේය. බැටරියකට දැරීමට සිදුවන ඉහළ ප්‍රාග්ධන වියදම සලකා බැලීමේදී අවම වශයෙන් වසර 20ක විදුලිය මිලදී ගැනීමේ ගිවිසුමක් ලබාදිය යුතු බවද පුනර්ජනනීය බලශක්ති සංවර්ධකයන්ගේ සම්මේලනය පැවැසුවේය.