නිමල කොඩිතුවක්කු

ශ්‍රී ලංකාවේ පාවෙන සූර්ය බල ශක්තිය සංවර්ධනය කිරීම සඳහා උපදේශන සේවා සැපයීම වෙනුවෙන් පිළිගත් සමාගම්වලින් යෝජනා කැඳවීමට කැබිනට් අනුමැතිය ලැබී ඇත.
වසර 2030 වන විට විදුලිබල උත්පාදනයෙන් සියයට 70ක් පුනර්ජනනීය බලශක්ති මූලාශ්‍රවලින් සපුරා ගැනීම සහ වසර 2050 වන විට විදුලි බල උත්පාදනය කිරීමේදී කාබන් උදාසීන භාවය ළඟා කර ගැනීම ඉලක්ක කර ගනිමින් රජය විසින් පුනර්ජනනීය බල ශක්තිය සංවර්ධනය කිරීම ජාතික ප්‍රමුඛතාවක් වශයෙන් හඳුනාගනු ලැබ ඇත.
ඒ අනුව, 2026 - 2030 පුනර්ජනනීය බල ශක්ති සම්පත් සංවර්ධන සැලැස්ම මඟින් මධ්‍යස්ථ සියයට 10ක මතුපිට උපයෝජනය මත පදනම් වු මෙගාවොට් 3,000ක ඇස්තමේන්තුගත පාවෙන සූර්ය බල ශක්ති ධාරිතාවක් සහිත විභව ජලාශ ස්ථාන හඳුනාගනු ලැබ තිබේ.
ඒ අනුව, සූර්ය බල ශක්ති ව්‍යාපෘති සංවර්ධනයේ නව ක්‍රම වේදයක් ලෙස පාවෙන සූර්ය බල ශක්තිය සම්බන්ධයෙන් ඇති වැදගත්කම සැලකිල්ලට ගනිමින්, පූර්ව ශක්‍යතා අධ්‍යයන, ශක්‍යතා අධ්‍යයන සහ පාරිසරික බලපෑම් තක්සේරු සිදු කිරීම සඳහා උපදේශන සේවා සැපයීම වෙනුවෙන් පිළිගත් සමාගම් වලින් යෝජනා කැඳවමින් ප්‍රසම්පාදන ක්‍රියාවලිය ආරම්භ කිරීම පිණිස බලශක්ති අමාත්‍යවරයා  ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.