• වත්කම් බැරකම් ප්‍රකාශයට අනුව ආචාර්ය නන්දලාල් වීරසිංහ හා ඔහුගේ පවුල සතුව රු.245,979,337ක්, ඇ.ඩො. 581,018ක් සහ ඔස්ට්‍රේලියානු ඩොලර් 16,730ක වත්කම්
• එම ප්‍රකාශයට අනුව මහ බැංකු අධිපතිවරයාගේ සහ ඔහුගේ පවුලේ සමස්ත වත්කම රුපියල් කෝටි 42 කට ආසන්නයි
• දේශීය ආදායම් දෙපර්තමේන්තුවේ ආදායම් බදු ලිපි ගොනුවක් විවෘත කළේ මීට වසර 40 කට පෙර
• තමන් සහ සිය පවුලේ සාමාජිකයන් ආයෝජනය කර ඇත්තේ මහ බැංකුවේ චර්යා ධර්ම සංග්‍රහයට අනුකූලව
• වත්කම් බැරකම් ප්‍රකාශය ගැන හෝ බදු ලිපිගොනුව පිළිබඳ හෝ ප්‍රශ්න තිබේ නම් පැමිණිලි කරන්න පුළුවන්
• වතක්ම් හා බැරකම් ප්‍රකාශ ඉදිරිපත් කිරීම ජාත්‍යන්තර මූල්‍ය අරමුදලේ රාජ්‍ය පාලන ඇස්තමේන්තුවේ නිර්දේශ වූවක්

විමුක්ති එස්. රුද්‍රිගු

දූෂණ විරෝධී පනතේ විධිවිධානවලට අනුකූලව ලබාදී ඇති වත්කම් බැරකම් ප්‍රකාශයේ සඳහන් තමන්ගේ සහ තම පවුලේ සියලු‍ම වත්කම් උපයා ඇත්තේ නීත්‍යානුකූලව බවත්, ආදායම් උපයාගත් ආකාරය පිළිබඳව සවිස්තරාත්මක පැහැදිලි කිරීමක් අවශ්‍ය ඕනෑම අයකුට ඒ පිළිබඳව නිසි ක්‍රියාපටිපාටිය අනුගමනය කරමින් පැමිණිල්ලක් ඉදිරිපත් කළ හැකි බවත් මහ බැංකු අධිපති ආචාර්ය නන්දලාල් වීරසිංහ මහතා ඊයේ (24) ප්‍රකාශ කළේය.
එලෙස පැමිණිලි කරන ඕනෑම අයකුට තමන් වත්කම් උපයාගත් ආකාරය අන්තිම සතේට පැහැදිලි කිරීමට බැඳී සිටින බවද මහ බැංකු අධිපතිවරයා පැවැසුවේය. තමන් මේ ආකාරයෙන්ම පසුගිය වසරේ මෙන්ම, ඊට පෙරද මෙලෙස වත්කම් හා බැරකම් ප්‍රකාශ ඉදිරිපත් කර තිබෙන බවද ඔහු පැවැසුවේය. තමන් දේශීය ආදායම් දෙපර්තමේන්තුවේ ආදායම් බදු ලිපි ගොනුවක් විවෘත කරනු ලැබුවේ මීට වසර 40 කට පෙර බවත්, තමන් උපයා ඇති වත්කම්වලට අන්තිම සතේට ආදායම් බදු ගෙවා තිබෙන බවත් ඔහු ප්‍රකාශ කළේය.
තමාට පමණක් නොව මහ බැංකුවේ සේවය කරන ඕනෑම නිලධාරියකුට චර්යා ධර්ම සංග්‍රහයක් තිබෙන බවත්, තමන් සහ සිය පවුලේ සාමාජිකයන් ආයෝජනය කර ඇත්තේ එම චර්යා ධර්ම සංග්‍රහයට අනුකූලව බවත් මහ බැංකු අධිපතිවරයා පැවැසුවේය. තමන් එම චර්යා ධර්ම සංග්‍රහය කිසිම විටකත් උල්ලංඝනය කර නොමැති බවත්, නමුත් ඕනෑම අයකුට තමන්ගේ වත්කම් බැරකම් ප්‍රකාශය ගැන හෝ බදු ලිපිගොනුව පිළිබඳ ප්‍රශ්න තිබේ නම් පැමිණිලි කළ හැකි බවත් ආචාර්ය නන්දලාල් වීරසිංහ මහතා ප්‍රකාශ කළේය.
වතක්ම් හා බැරකම් ප්‍රකාශ ඉදිරිපත් කිරීම ඉතාමත් හොඳ දෙයක් බවත්, එය ජාත්‍යන්තර මූල්‍ය අරමුදලේ රාජ්‍ය පාලන ඇස්තමේන්තුවේ නිර්දේශ වූවක් බවත් ආචාර්ය වීරසිංහ මහතා පැවැසුවේය.
ප්‍රතිපත්ති පොලී අනුපාතික සම්බන්ධයෙන් මාධ්‍ය දැනුවත් කිරීම සඳහා ශ්‍රී ලංකා මහ බැංකුවේදී ඊයේ (24) පැවැති මාධ්‍ය හමුවේදී මහ බැංකු අධිපති ආචාර්ය නන්දලාල් වීරසිංහ මහතා මෙම අදහස් පළ කළේය.
ආචාර්ය නන්දලාල් වීරසිංහ මහතාගේ වත්කම් බැරකම් ප්‍රකාශයට අනුව ඔහු හා ඔහුගේ පවුල සතුව රු.245,979,337ක්, ඇ.ඩො. 581,018ක් සහ ඔස්ට්‍රේලියානු ඩොලර් 16,730ක වත්කම් තිබේ. එම ප්‍රකාශයට අනුව මහ බැංකු අධිපතිවරයාගේ සහ ඔහුගේ පවුලේ සමස්ත වත්කම රුපියල් කෝටි 42 කට ආසන්න වේ. එම වත්කම්වලට භාණ්ඩාගාර බැඳුම්කරද අයත් වන අතර, මහ බැංකු අධිපතිවරයාව සිටියදී භාණ්ඩාගාර බැඳුම්කරවල ආයෝජනය කිරීම සම්බන්ධයෙන් මාධ්‍යවේදියකු නැගූ ප්‍රශ්නයකට පිළිතුරු දෙමින් මහ බැංකු අධිපතිවරයා මෙම අදහස් පළ කළේය.