නිමල කොඩිතුවක්කු

දක්ෂිණ අධිවේගී මාර්ගයේ කොට්ටාවේ සිට දොඩන්ගොඩ දක්වා මාර්ග කොටසක් ප්‍රතිසංස්කරණයට කොන්ත්‍රාත් දීම සඳහා කැබිනට් අනුමැතිය ලැබී ඇතැයි කැබිනට් මාධ්‍ය ප්‍රකාශක, සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා පැවසීය.
දක්ෂිණ අධිවේගී මාර්ගයේ කිලෝමීටර 0 සිට කිලෝමීටර 19 දක්වා අධිවේගී මාර්ග කොටස සහ කිලෝමීටර 19 සිට කිලෝමීටර 34 දක්වා අධිවේගී මාර්ග කොටස, පැකේජ දෙකක් යටතේ කඩිනමින් අලු‍ත්වැඩියා කිරීමේ අවශ්‍යතාව හඳුනාගනු ලැබ ඇති බවත් අමාත්‍යවරයා සඳහන් කළේය. 
ඒ අනුව, කිලෝමීටර් 19ක මංතීරු 4කින් යුත් අධිවේගී මාර්ග ප්‍රමාණයක් ආවරණය වන කිලෝ මීටර 0 සිට කිලෝමීටර 19 දක්වා හානියට පත්වූ අධිවේගී මාර්ග කොටස දෙවන පැකේජය යටතේ ප්‍රතිසංස්කරණය කිරීමට සැලසුම් කර ඇත. 
ඒ සඳහා දේශීය කොන්ත්‍රාත්කරුවන් වෙතින් ජාතික තරගකාරී ක්‍රමවේදය යටතේ ලංසු කැඳවා ඇති අතර, ලංසු 05 ක් ඉදිරිපත් වී තිබේ. 
ලංසු ඇගැයීම් කමිටුවේ සහ ඉහළ මට්ටමේ ස්ථාවර ප්‍රසම්පාදන කමිටුවේ නිර්දේශ මත පදනම්ව අදාළ කොන්ත්‍රාත්තුව ශ්‍රී ලංකා රුපියල් මිලියන 1,490.96 ක මුදලකට අවම ලංසුකරු වශයෙන් M/s Access - WKKබද්ධ ව්‍යාපාරය වෙත ප්‍රදානය කිරීම පිණිස ප්‍රවාහන, මහා මාර්ග, වරාය සහ සිවිල් ගුවන් සේවා අමාත්‍යවරයා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.