භානුක අමරසිංහ

මෙරට ප්‍රමුඛතම සන්නාමයක් වන එලිෆන්ට් හවුස් සන්නාමය අයත් Ceylon Cold Stores (CCS), ඉන්දියාවේ Reliance Consumer Products Limited (RCPL) සමග හවුල්කාරිත්වයකට එළඹෙමින්, එරට ජනප්‍රිය දේශීය සිසිල්බීම සන්නාමයක් වන Campa සන්නාමය අද (12) සිට ශ්‍රි ලංකාවට හඳුන්වා දෙන බව පවසයි.

පසුගිය වසරේදී Ceylon Cold Stores (CCS) සමාගම ඉන්දියාවේ Reliance සමූහය සමගින් ඇති කරගත් එකඟතාවකට අනුව එලිෆන්ට් හවුස් පාන වර්ග ඉන්දියානු වෙළෙඳපොළට සාර්ථකව හඳුන්වා දීමේ සහයෝගීතාවේ ප්‍රතිඵලයක් ලෙස මෙම හඳුන්වාදීම සිදු කෙරෙන බව සමාගම් දෙකම පවසයි. 

මෙම Campa සන්නාමය 1970 - 80 දශකවල සිත් ගත් සන්නාමයක් වන අතර, 2022 වසරේදී Reliance Consumer Products Limited සමාගම මෙම Campa Cola සමාගම අත්පත් කරගැනීමෙන් අනතුරුව නැවතත් එය ඉන්දියානු වෙළෙඳපොළ වෙත හඳුන්වාදුනි. Reliance Consumer Products Limited සමාගම ඉන්දියාවේ මෙන්ම ආසියාවේද අංක එකේ ධනවතා වන මුකේෂ් අම්බානිට අයත් Reliance සමූහයට අයත් සමාගමකි. 

විශේෂයෙන්ම මෙම Campa සන්නාමය, ලංකාවේ වෙළෙඳපොළට ඇතුළුවීම, Reliance Consumer Products Limited  හි පාරිභෝගික සන්නාම, ප්‍රධාන කලාපීය වෙළෙඳපොළවල් හරහා පුළුල් කිරීමේ උත්සාහය තවදුරටත් ශක්තිමත් කරන බව එම සමාගම පවසයි.