• ලංකා ස්පෙෂල් ස්ටීල්ස් සමාගම ලක්ෂපාන පීඑල්සී වෙත අලෙවි කිරීම ගැන සාකච්ඡා යළි ඇරඹෙයි

භානුක අමරසිංහ

කොළඹ කොටස් හුවමාරුවේ ලැයිස්තුගත ඊ.බී. ක්‍රීසි සහ සමාගම සිය පූර්ණ හිමිකාරීත්වය සහිත පරිපාලිත සමාගමක් වන ලංකා ස්පෙෂල් ස්ටීල්ස් ලිමිටඞ් සමාගම වෙත තවත් රුපියල් මිලියන 400ක ආයෝජනයක් කළ බව පවසයි. පසුගිය ඔක්තෝබර් 02 වැනිදා මෙම ආයෝජනය සිදු කර තිබේ. 

මේ අතරින් රුපියල් මිලියන 300ක් එම සමාගමේ කොටසක් රුපියල් 11.04ක් බැගින් සාමාන්‍ය කොටස් 27,173,914ක් වෙත සිදුකළ ඍජු ආයෝජනයක් ලෙස මිලදී ගැනීමෙන්ද, ඉතිරි රුපියල් මිලියන 100ක් ලංකා ස්පෙෂල් ස්ටීල්ස් ලිමිටඩ් සමාගම ඊ.බී.ක්‍රීසි සහ සමාගම වෙත ගෙවීමට ඇති ණය වටිනාකමට ගැළපෙන ලෙස කොටසක් රුපියල් 11.04ක් බැගින් සාමාන්‍ය කොටස් 9,057,971ක් හුවමාරු කිරීමක් ලෙසද සිදුව තිබේ.

මීට පෙර 2024 පෙබරවාරි 27 වැනිදා ඊ.බී. ක්‍රීසි සහ සමාගම, මෙම ලංකා ස්පෙෂල් ස්ටීල්ස් ලිමිටඩ් සමාගමේ සියයට 100ක කොටස් හිමිකාරීත්වයක් තම පරිපාලිත සමාගමක් වන ලක්ෂපාන පීඑල්සී සමාගම වෙත අලෙවි කිරීමට තීරණය කළේය. කෙසේ වෙතත් 2024 ජූලි මාසයේදී නිවේදනයක් නිකුත් කළ ලක්ෂපාන පීඑල්සී අධ්‍යක්ෂ මණ්ඩලය අදාළ ගනුදෙනුව යළි ඇගයීමක් කරන බව පවසා සිටියේය.

2025 අප්‍රේල් මාසයේදී ඊ.බ්‍රී. ක්‍රීසි සහ සමාගම ලංකා ස්පෙෂල් ස්ටීල්ස් ලිමිටඩ් සමාගම තුළ රුපියල් මිලියන 400ක් ආයෝජනය කළ අතර, එහිදී එම සමාගම මගින් ඊ.බී.ක්‍රීසි. සහ සමාගම වෙත ගෙවීම‍ට ඇති ණය වටිනාකම සඳහා කොටසක් රුපියල් 13.65ක් බැගින් සාමාන්‍ය කොටස් 29,304,029ක් හුවමාරු කිරීමක් සිදු විය.
මේ අතර ලංකා ස්පෙෂල් ස්ටීල්ස් ලිමිටඞ් සමාගමෙහි සියයට 100ක කොටස් හිමිකාරීත්වයක් ලක්ෂපාන පීඑල්සී වෙත අලෙවි කිරීම සම්බන්ධයෙන් සමාගම් දෙකම ඉදිරියටත් සාකච්ඡා පවත්වන බව ඊ.බී. ක්‍රීසි සහ සමාගම සඳහන් කර සිටියි.