භානුක අමරසිංහ

කොළඹ කොටස් හුවමාරුවේ ලැයිස්තුගත ආයෝජන සමාගමක් වන ඇම්බියොන් හෝල්ඩිංග්ස් පීඑල්සී සමාගම සහ ඇම්බියොන් කැපිටල් පීඑල්සී සමාගම හෝටල් සමාගම් දෙකක කොටස් මිලදී ගත් බව පවසයි. මෙම ගනුදෙනුවල වටිනාකම රු.මි. 870ක් (රු. 870,929,582) ලෙස සටහන්ව ඇත. 
මේ අතරින් ඇම්බියොන් හෝල්ඩිංග්ස් පීඑල්සී සමාගම කැන්ඩි හොටේල්ස් කෝපරේෂන් (1938) පීඑල්සී සමාගමෙහි කොටස් 45,904,622ක් මිලදී ගෙන ඇති අතර, එය සමස්ත කොටස් අතරින් සියයට 6.09 කි. මෙහිදී කොටසක් රුපියල් 12ක් බැගින් මිලදී ගෙන තිබේ. ගනුදෙනුවේ වටිනාකම රු.මි. 550ක් (550,855,464) වෙයි. 
එසේම ඇම්බියොන් කැපිටල් පීඑල්සී සමාගම සිලෝන් හොටේල්ස් කෝපරේෂන් පීඑල්සී සමාගමෙහි කොටස් 12,310,543ක් මිලදී ගෙන ඇති අතර, එය සමස්ත කොටස් අතරින් සියයට 6.84 කි. මෙහිදී කොටසක් රුපියල් 26ක් බැගින් මිලදී ගෙන තිබේ. ගනුදෙනුවේ වටිනාකම රු.මි. 320ක් (320,074,118) වෙයි. ඒ අනුව ගනුදෙනු දෙකෙහිම වටිනාකම රු.මි. 870කි.
මහනුවර පිහිටි ක්වීන්ස් හෝටලය සහ Hotel Suisse හි හිමිකාරීත්වයද ඇත්තේ කැන්ඩි හොටේල්ස් කෝපරේෂන් (1938) පීඑල්සී සමාගමටයි. එසේම මාලදිවයිනේ පිහිටි Ceylon Hotels Maldives ද ඊට අයිතිය. කැන්ඩි හොටේල්ස් කෝපරේෂන් (1938) පීඑල්සී සමාගමේ සියයට 70.09 ක කොටස් හිමිකාරීත්වයක් සිලෝන් හොටේල්ස් කෝපරේෂන් පීඑල්සී සමාගම සතුය.