• වත්මන් ප්‍රතිශතය සියයට 19.6 ක්
• 2025 පළමු මාස දෙකේදී පිට පිට ඩොලර් බිලියන 1.4 කට ආසන්න අපනයන ආදායමක්

භානුක අමරසිංහ 

වසර 2030 වන විට මෙරට අපනයන ආදායම දළ දේශීය නිෂ්පාදිතයෙන් සියයට 25 ක ප්‍රතිශතයක් කරා ළඟා කිරීම සිය අපේක්ෂාව බව අපනයන සංවර්ධන මණ්ඩලයේ සභාපති මංගල විජේසිංහ මහතා පවසයි. 

එම මණ්ඩලය විසින් සංවිධානය කරන ලද 25 වැනි අපනයකරුවන්ගේ සංසදය අමතමින් සභාපතිවරයා මේ බව පවසා සිටියේය. 

“වර්තමානයේදී ශ්‍රී ලංකාවේ අපනයන ආදායම දළ දේශීය නිෂ්පාදනයෙන් සියයට 19.6  ක්. එය ඉදිරි වසර 5 ඇතුළත සියයට 25 කට වඩා වැඩි අගයක් බවට පත් කිරීම අපේ අපේක්ෂාවයි.” 

ඒ අනුව මේ වසරේදී අපනයන ආදායම ඩොලර් බිලියන 19 ක් ඉක්මවීම අරමුණ බවද සභාපතිවරයා පැවසීය. පසුගිය වසරේදී රැස්කරගත් ඩොලර් බිලියන 16 ක ඉලක්කයක සිට මේ වසරේදී ඩොලර් බිලියන 19 ක ඉලක්කයක් දක්වා යන ගමන ලොකු අභියෝග රැසක් පවතින්නක් බවත් ඔහු පවසයි. 

“2025 පළමු මාස දෙකේදී පිට පිට ඩොලර් බිලියන 1.4 කට ආසන්න අපනයන ආදායමක් රැස් කිරීමට හැකියාව ලැබී තියෙනවා. දෙවැනි කාර්තුවේදී එම ආදායම මාසිකව ඩොලර් බිලියන 1.6 ක් දක්වා වැඩිවේවි. තෙවැනි සහ සිව්වැනි කාර්තුවලදී එය ඩොලර් බිලියන 1.7 ත් 1.8 ත් අතර අගයක් ගනීවි.” සභාපතිවරයා පවසයි. 

ඒ අනුව 2024 හා සැසඳීමේදී මේ වසරේදී අපනයන ආදායමේ සියයට 14 ක වර්ධනයක් ඇතිවේ යැයි අපේක්ෂා කරන බවත්, 2023 වසරට සාපේක්ෂව 2024 දී එය සියයට 6 ක වර්ධනයක් පෙන්නුම් කළ බවත් ඔහු සඳහන් කළේය. 

“ලංකාවේ අපනයනවලින් සියයට 25 ක්ම යන්නේ ඇමෙරිකා එක්සත් ජනපදයට. ඉදිරි පස්අවුරුදු සැලසුම යටතේ අපේ අපනයන ආදායම ඩොලර් බිලියන 36 කට වැඩි කිරීම අපේක්ෂාවයි. එතැනදී භාණ්ඩ අපනයන ආදායම ඩොලර් බිලියන 27.5 කුත්, සේවා අපනයන ආදායම ඩොලර් බිලියන 8.5 කුත් ලෙස ඉලක්කයක් පවතිනවා.” සභාපති වරයා කීවේය