පළමු මාස 8දී මෙරට අයවැය හිඟය රු.බි. 911 ක්
පළමු මාස අටේදී බදු ආදායම රු. බි. 3068.5 ක් දක්වා ඉහළට
රජයේ වියදමද රු.බි.3381.3 දක්වා මෙම වසරේ පළමු මාස අටේදී වර්ධනය වෙලා

විමුක්ති එස් රුද්‍රිගු

පසුගිය අගෝස්තු මාසය වනවිට මෙරට අයවැය හිඟය රුපියල් බිලියන 411 දක්වා පහළ ගොස් ඇති බවත් එය ප්‍රතිශතයක් ලෙස සියයට 55 ක පමණ අයවැය හිඟයේ පහළ යාමක් බවත් මුදල් ශ්‍රී ලංකා මහ බැංකු දත්ත වාර්තා පෙන්වා දුන්නේය. ඒ අනුව මෙම වසරේ පළමු මාස 8දී මෙරට අයවැය හිඟය රුපියල් බිලියන 911 ක් බවද එහි සඳහන් වේ.
මෙම වසරේ පළමු මාස අටේදී බදු ආදායම රුපියල් බිලියන 3068.5 ක් දක්වා ඉහළ ගොස් ඇති බවත් පසුගිය වසරේ පළමු මාස අටට සාපේක්ෂව එය සියයට 30.7 ක ඉහළ යාමක් බවත් එම වාර්තාවේ දැක්වේ. පසුගිය වසරේ පළමු මාස 8දී මෙරට බදු ආදායම රුපියල් බිලියන 2348.5 ක් බවද එම වාර්තාවේ සඳහන් වේ.
ඒ අනුව මෙම වසරේ රජයේ සමස්ත ආදායම රුපියල් බිලියන 3301.5 ක් බවත් පසුගිය වසරේ පළමු මාස 8 ට සාපේක්ෂව එය සියයට 28.7 ක ඉහළ යාමක් බවත් එම දත්ත වාර්තාව පෙන්වා දුන්නේය. පසුගිය වසරේ පළමු මාස අටේදී රජයේ සමස්ත ආදායම රුපියල් බිලියන 2565.9 ක් විය. මෙම වසරේ පළමු මාස 8දී රජයේ බදු නොවන ආදායම රුපියල් බිලියන 226.2 ක් බවත් එය පසුගිය වසරේ පළමු මාස අටට සාපේක්ෂව සියයට සියයට 8.1 ක ඉහළ යාමක් බවත් එම දත්ත වාර්තාවේ දැක්වේ.
රජයේ වියදමද රුපියල් බිලියන 3381.3 දක්වා මෙම වසරේ පළමු මාස අටේදී වර්ධනය වී ඇති අතර පසුගිය වසරේ පළමු මාස අටට සාපේක්ෂව එය සියයට 11.2 වර්ධනයක් විය.