ශ්‍රී ලංකාවේ Mercedes-Benz සඳහා එකම බලයලත් බෙදාහරින්නා වන DIMO , අග්නිදිග ආසියා කලාපයෙහි අනෙකුත් බෙදාහැරීමේ නියෝජිතයන් අභිබවා යමින්, Mercedes-Benz සේවා විශිෂ්ටතා කලාපීය සම්මාන උලෙළේදී ‘General Distributor’ සම්මානය දිනාගනු ලැබීය.
වසර 85 කට වැඩි කාලයක් මෝටර් රථ විශිෂ්ටත්වය පිළිබඳ අධිකාරිත්වය සමගින් ලබාගත් මෙම ජයග්‍රහණය, Mercedes-Benz AG විසින් ස්ථාපිත කරන ලද ඉහළ ජාත්‍යන්තර සේවා ප්‍රමිති අඛණ්ඩව පවත්වා ගැනීම සඳහා DIMO හි කැපවීමෙහි තවත් එක් සංධිස්ථානයක් වේ. තවද සමාගමේ අලෙවියෙන් පසු සේවාවන්හි අඛණ්ඩ විශිෂ්ටත්වය ද මෙම සම්මානයෙන් මැනවින් තහවුරු වේ. එසේම මෙම අවස්ථාවේදී DIMO හි Mercedes-Benz අලෙවියෙන් පසු සේවා අංශයේ අබිලාෂ් ශ්‍රියන්කරන් ‘Top Service Adviser-Sri Lanka’ සම්මානයෙන් පිදුම් ලබන ලදී.
Mercedes-Benz AG විසින් පවත්වන සේවා ගුණාත්මක විගණන මගින් DIMO හි තාක්ෂණික දැනුම හා ජාත්‍යන්තර සේවා ප්‍රමිතීන්ට අනුකූල වීම තහවුරු කරන අතර, ස්වාධීන පාරිභෝගික සමීක්ෂණයක් හරහා ද ඉහළම පාරිභෝගික තෘප්තිය සහ පාරිභෝගික පක්ෂපාතීත්වය පවත්වා ගැනීමෙන් DIMO හි පාරිභෝගික අත්දැකීම් පිළිබඳ විශිෂ්ටතාව විදහා දක්වයි.
මේ පිළිබඳව අදහස් දක්වමින් DIMO හි Automotive Engineering Solutions හි ප්‍රධාන මෙහෙයුම් නිලධාරී මහේෂ් කරුණාරත්න මෙසේ සඳහන් කළේය. “මෙම සම්මානයට නැවත පාත්‍ර වීමෙන් ශ්‍රී ලංකාව තුළ ජාත්‍යන්තර මට්ටමේ Mercedes-Benz අලෙවියෙන් පසු සේවා ලබා දීමට අප දක්වන කැපවීම පෙන්වා දෙනවා. නවීන තාක්ෂණ කෙරෙහි ආයෝජනය කිරීම, වාර්ෂික සේවා විගණනය කිරීම සහ පාරිභෝගික ප්‍රතිචාර විශ්ලේෂණය කිරීම හරහා DIMO විසින් Mercedes-Benz AG හි දැඩි ජාත්‍යන්තර සේවා ප්‍රමිති අනුගමනය කරන බවට තහවුරු කරනවා. Mercedes-Benz AG සහතික කළ අලු‍ත්වැඩියා මාර්ගෝපදේශ, ක්‍රියාවලි, විශේෂ මෙවලම් සහ උපකරණ, මෘදුකාංග යාවත්කාලීන කිරීම් සහ Mercedes-Benz නියම අමතර කොටස් භාවිතයෙන් අපගේ පාරිභෝගිකයන් අප කෙරෙහි පවතින විශ්වාසය තව තවත් වැඩිදියුණු වෙනවා. Mercedes-Benz AG ජාත්‍යන්තර තාක්ෂණික පුහුණුව සහ සහතික කිරීම් තුළින් අපගේ කාර්මිකයන් සහ සේවා උපදේශකයන්ගේ උසස් තත්වය සහතික කරනවා.”‍
වාහන ආනයනය නවතා දමා තිබූ කාල වකවානුව තුළදී DIMO සිය අලෙවියෙන් පසු සේවා විශාල වශයෙන් පුළුල් කරනු ලැබුවේ Mercedes-Benz පාරිභෝගිකයන්ට වඩාත් හොඳ සේවාවක් ලබා දීම සඳහාය. DIMO විසින් අලෙවියෙන් පසු සේවා සහ අලු‍ත්වැඩියාව කෙරෙහි අවධානය යොමු කරන සුවිශේෂී පැකේජ දියත් කර ඇති අතර, Mercedes-Benz Flying Doctor වැඩසටහන වැනි අන්තර්ජාතික සේවා සමගින් පාරිභෝගික කේන්ද්‍රීය ප්‍රවේශයක් සහතික කරයි. තවද දෝෂ විනිශ්චය සඳහා තාක්ෂණය සහ උපකරණ කෙරෙහි ආයෝජනය කර ඇති අතර, නවීනතම පහසුකම් සමගින් දෝෂ රහිත අලු‍ත්වැඩියාව සහ නඩත්තු කිරීම සහතික කරයි.