හැටන් නැෂනල් බැංකුව සියලුම බැංකු සේවා සහ පහසුකම්වලින් සමන්විත පාරිභෝගික ඒකකයක් පසුගිය දා City of Dreams Sri Lanka හිදී විවෘත කළේය.
ශ්‍රී ලංකාව තුළ මෙතෙක් ඉදිවූ විශාලතම සහ ප්‍රමුඛතම ඒකාබද්ධ හෝටල් සංකීර්ණය වන City of Dreams Sri Lanka හිදී විවෘත කළ මෙම HNB නව පාරිභෝගික ඒකකයෙන් පුළුල් පරාසයක බැංකු සේවා සඳහා ජනතාවට පහසු ප්‍රවේශයක් ලබා දෙයි. තවද මෙම විවෘත කිරීමෙන් බැංකුව හා ජෝන් කීල්ස් හෝල්ඩින්ග්ස් සමූහය අතර පවතින දිගුකාලීන ශක්තිමත් සම්බන්ධතාව මැනවින් පෙන්නුම් කරන අතර, City of Dreams Sri Lanka සඳහා අරමුදල් සැපයීමේදී HNB ඉතා වැදගත් කාර්යභාරයක් ඉටුකරනු ලැබීය.
මෙම පාරිභෝගික ඒකකය මගින් උපදේශන සේවා සහ ස්වයං සේවා යන්ත්‍ර ඇතුළුව HNB හි සියලුම බැංකු සේවා සපයයි. එමෙන්ම එය සංචාරකයන්, අවට පදිංචිකරුවන්, ව්‍යාපාර සහ City of Dreams Sri Lanka වෙත පැමිණෙන සියලුම දේශීය හා ජාත්‍යන්තර අමුත්තන්ගේ මූල්‍ය අවශ්‍යතා සපුරාලීම සඳහා නිර්මාණය කර ඇත.
City of Dreams Sri Lanka දකුණු ආසියාවේ පළමු පූර්ණ ඒකාබද්ධ සංචාරක හෝටල් සංකීර්ණය මෙන්ම පෞද්ගලික අංශය විසින් සිදුකරනු ලබන විශාලතම ආයෝජනය ලෙස සැලකෙයි. තවද මෙරට ආර්ථිකයේ හදවත බඳු කොළඹ නගර මධ්‍යයේ පිහිටා ඇති මෙම සුඛෝපභෝගී සංචාරක හෝටල් සංකීර්ණය මගින් ශ්‍රී ලංකාව ගෝලීය සංචාරක සිතියමේ කේන්ද්‍රස්ථානයක් බවට පත්කිරීමට අරමුණු කරයි.
මේ පිළිබඳව අදහස් දක්වමින් කළමනාකාර අධ්‍යක්ෂ/ප්‍රධාන විධායක නිලධාරි දමිත් පල්ලෙවත්ත මහතා මෙසේ පැවසුවේය. “මෙම පාරිභෝගික ඒකකය විවෘත කිරීම මගින් HNB ශ්‍රී ලංකාවේ ආර්ථිකයේ සහ ව්‍යාපාරික අංශවල ප්‍රධාන, වර්ධනය වන ක්ෂේත්‍රවල කොටසක් වීමට දරන අඛණ්ඩ උත්සාහය පෙන්නුම් කරනවා. City of Dreams Sri Lanka එහි විශාලත්වය සහ සංචාරක කර්මාන්තයට ධනාත්මක ලෙස බලපෑම් කිරීමට එයට ඇති හැකියාව නිසා මෙම නව පාරිභෝගික ඒකකය ශ්‍රී ලංකාවේ වැදගත් ආයෝජනයක් ලෙස හැඳින්වීමට පුළුවන්. සෑම නවීන බැංකු අවශ්‍යතාවක් සඳහාම ආරක්ෂිත, වෘත්තීයමය සහ පහසු බැංකු සේවා සපයන මෙම සුඛෝපභෝගී හෝටල් සංකීර්ණය තුළ ක්‍රියාත්මක වන එකම බැංකුව වීම ගැන HNB නිහතමානීව ආඩම්බර වෙනවා.” 
HNB කළමනාකාර අධ්‍යක්ෂ/ප්‍රධාන විධායක නිලධාරී දමිත් පල්ලෙවත්ත, ජෝන් කීල්ස් හෝල්ඩින්ග්ස් හි සභාපති ක්‍රිෂාන් බාලේන්ද්‍ර සහ HNB ප්‍රධාන මෙහෙයුම් නිලධාරී සන්ජේ විජේමාන්න යන මහත්වරුන් City of Dreams Sri Lanka  හිදී නවතම HNB පාරිභෝගික ඒකකය උත්සවාකාරයෙන් විවෘත කළ අවස්ථාව ඡායාරූපයේ දැක්වෙයි.