ශ්‍රී ලංකාවේ ප්‍රථම පෞද්ගලික හිමිකාරිත්වය ඇති ජාත්‍යන්තර ගුවන් සේවය වන FitsAir, සිය ගුවන් මගී සේවා දියත් කිරීමෙන් මාස 6ක කාලයක් ඇතුළත මගීන් 50,000 කට අධික සංඛ්‍යාවක් පියාසර කරමින් සුවිශේෂී සන්ධිස්ථානයකට එළැඹ ඇති බව නිවේදනය කරයි. ගමනාන්ත 3 ක්  පමණක් ක්‍රියාත්මක වෙමින් අත්පත් කර ගත් මෙම සුවිශේෂී සන්ධිස්ථානය ගුවන් සේවයේ අඛණ්ඩ වර්ධනය පිළිබිඹු කරන බව ද එම ආයතනය කියයි.

FitsAir සිය ජාත්‍යන්තර මගී සේවා 2022 ඔක්තෝම්බර් මාසයේ දී දියත් කරනු ලැබුවේ පාරිභෝගිකයන්ට දැරිය හැකි මිලෙන් යුත් පහසු සංචාරක විකල්ප ලබා දීමේ අරමුණෙනි. මේ හේතුවෙන් ආරම්භයේ සිටම සිය සේවා සඳහා ඇති ඉල්ලුමේ සැලකිය යුතු වර්ධනය වීමක් ගුවන් සමාගමට අත්විඳිය හැකි විය.

සුවිශේෂී පාරිභෝගික අත්දැකීමක් ලබාදීමට අපි නිරතුරුවම කැපවී සිටිනවා. අපගේ පාරිභෝගිකයන්ගෙන් මෙවැනි ප්‍රතිචාරයක් ලැබීම අපට සතුටක්. මෙම සන්ධිස්ථානය අප කණ්ඩායමේ සියලු 
දෙනාගේම කැපවීම විදහා දක්වන්නක්. මින් ඉදිරියටත් අපගේ පාරිභෝගිකයන්ට ආරක්ෂිත සහ සුවපහසු ගුවන් ගමන් සැපයීමට අපි බලාපොරොත්තු වෙනවා. FitsAir හි විධායක අධ්‍යක්ෂ අමර් කාසිම් මහතා පැවසීය.

ඒ මහතා වැඩිදුරටත් මෙසේ ද පැවසීය. අප කෙරෙහි විශ්වාසය තබමින් අප සමඟ පියාසර කිරීමට තෝරා ගත් පාරිභෝගිකයන්ට මම අපගේ අවංක කෘතඥතාව පළකර සිටිනවා. මගීන් 50,000 කට සේවය කිරීමට ලැබීම අප ලද මහඟු ගෞරවයක්.

මෙම සුවිශේෂී සන්ධිස්ථානය සමරමින් FitsAir සිය 50,000 වැනි පාරිභෝගිකයාට නොමිලේ ගුවන් ටිකට් පතක් පිරිනමනු ලැබුවා.

තරඟකාරී මිල ගණන් සහ සුවිශේෂී සංචාරක අත්දැකීමක් සියලු පාරිභෝගිකයන්ට ලබා දීම කෙරෙහි අවධානය යොමු කරමින්, අඩු වියදමක් සහිත ප්‍රමුඛතම ගුවන් ගමන් සපයන්නා වීම FitsAir හි අපේක්ෂාවයි.

595