සෙලාන් බෑන්ක් පීඑල්සී හි ජාතික දීර්ඝකාලීන ශ්‍රේණිගත කිරීම් 'A-(lka), with a Stable outlook’ මට්ටමේ සිට 'A+(lka), with a Stable outlook’ දක්වා අදියර දෙකකින් ඉහළ දැමීමට Fitch Ratings මෑතකදී කටයුතු කළේය. 
Fitch Ratings මගින් ශ්‍රී ලංකා ජාතික ශ්‍රේණිගත කිරීමේ පරිමාණය නැවත ක්‍රමාංකණය කිරීමේ ප්‍රතිඵලයක් ලෙස මෙම ඉහළ නැංවීම සිදුකර ඇත. මෙය සෙලාන් බැංකුවේ මූල්‍ය ස්ථාවරත්වයට මෙන්ම, මෙරට බැංකු ක්ෂේත්‍රය තුළ ස්ථාවර තත්වයක පසුවීමට එය සමත් වී ඇති බවට මනා සාක්ෂියකි. 
එමෙන්ම අභියෝගවලට මුහුණ දීමට සෙලාන් බැංකුවේ ව්‍යාපාර ආකෘතියට ඇති හැකියාව සහ එම බැංකුව ක්‍රියාවට නංවා ඇති අවදානම් කළමනාකරණ ක්‍රමවේදවල සාර්ථකත්වය මෙන්ම අඛණ්ඩව සිය කාර්යසාධනය වැඩිදියුණු කරගැනීමට බැංකුව සමත් වී තිබීම යනාදිය මෙමගින් මැනැවින් පිළිබිඹු වේ. තවද අභියෝගකාරී වෙළඳපොළ තත්වය ජය ගන්නා අතරම අඛණ්ඩව ක්‍රමෝපායික ඉලක්ක ළඟා කරගැනීමට සෙලාන් බැංකුවට හැකියාව ලැබී ඇති බවටද එය මනා සාක්ෂියකි. 

මේ සම්බන්ධයෙන් සෙලාන් බැංකුවේ ප්‍රධාන විධායක නිලධාරී රමේෂ් ජයසේකර මහතා මෙසේ අදහස් දැක්වීය. “මේ ආකාරයට අපගේ ශ්‍රේණිය ඉහළ දමනු ලැබීම, සෙලාන් බැංකුවේ මූල්‍ය ශක්තිය මෙන්ම පාර්ශ්වකරුවන්ට ඉහළම වටිනාකම් තිළිණ කිරීමට බැංකුව දක්වන නොසැලෙන කැපවීම නැවත වරක් තහවුරු කරන සාධකයක් ලෙස අප දකිනවා. ඉදිරියටත් තිරසාර වර්ධනය කෙරෙහි අවධානය යොමු කරමින්, අප දැනට පවත්වාගෙන යන ශක්තිමත් මූල්‍ය තත්වය අඛණ්ඩව පවත්වා ගැනීම අපගේ අරමුණයි.”
Fitch Ratings මගින් ශ්‍රී ලංකාවේ දිගුකාලීන විදේශ මුදල් නිකුත් කරන්නන්ගේ පෙරනිමි ශ්‍රේණිගත කිරීම (IDR) 'CCC-' සිට 'CCC+' දක්වා ඉහළ නැංවීමට සමගාමීව සෙලාන් බැංකුවේ ශ්‍රේණිය ඉහළ දැමීම ද සිදු විය. මෙය ශ්‍රී ලංකාවේ අනෙකුත් ණය දෙන්නට සාපේක්ෂව සෙලාන් බැංකුවේ ණය යෝග්‍යතාව සනාථ කරන අතරම දේශීය බැංකු ක්ෂේත්‍රයේ තරගකාරීත්වය අතින් ඉදිරියට පැමිණීමට එම බැංකුව සමත් වී ඇති බවට ද සාක්ෂි දරයි. 
ඉදිරියටත් ඩිජිටල් පරිවර්තනය, පාරිභෝගික-කේන්ද්‍රීය නවෝත්පාදනය සහ තිරසාර බැංකුකරණ ක්‍රමවේද භාවිතයට ගැනීම ආදියට ක්‍රමෝපායික ප්‍රමුඛතාව ලබා දෙන අතරම, තමන් සතු ශක්තිමත් මූල්‍ය තත්වය අඛණ්ඩව පවත්වා ගනිමින්, තම ඉදිරිගාමී ආකල්ප ඔස්සේ දිගින් දිගටම වෙළෙඳපොළ ජය ගැනීම සෙලාන් බැංකුවේ අරමුණ වී තිබේ.