• සේවා ආර්ථික කටයුතුවල සියයට 2.8 ක වර්ධනයක්
• රක්ෂණ සේවා සියයට 17.4 ක, මූල්‍ය සේවා සියයට 14.6ක, නවාතැන් සහ ආහාර පාන සැපයීම් සියයට 14ක වර්ධනයක්

භානුක අමරසිංහ 

මෙම වසරේ පළමු කාර්තුවේදී මෙරට සේවා ආර්ථික කටයුතු සියයට 2.8 ක වර්ධනයක් පෙන්නුම් කර ඇතැයි ජනලේඛන හා සංඛ්‍යාලේඛන දෙපාර්තමේන්තුව පවසයි. අදාළ කාර්තුව සඳහා ජාතික ගිණුම් ඇස්තමේන්තුව ඉදිරිපත් කරමින් එම දෙපාර්තමේන්තුව මේ බව සඳහන් කර සිටියි. 

මෙහිදී රාජ්‍ය පරිපාලන ක්‍රියාකාරකම් හැර අනෙකුත් සේවා ආර්ථික කටයුතු සියල්ලම මෙම පළමු කාර්තුව තුළදී ධන වර්ධන වේගයක් වාර්තා කර තිබීම විශේෂත්වයකි. 

ඒ අනුව රක්ෂණ සේවා සියයට 17.4 ක, මූල්‍ය සේවා සියයට 14.6ක, නවාතැන් සහ ආහාර පාන සැපයීම් සියයට 14ක, තොරතුරු තාක්ෂණ සේවා සැපයිම් සියයට 6.2ක, තැපැල් හා කුරියර් සේවා සියයයට 4.5ක වර්ධනයක් පෙන්නුම් කර තිබේ.

එසේම දේපළ වෙළෙඳාම් කටයුතු සහ නිවාස අයිතිය සියයට 2.1ක, වෘත්තීය සේවා සියයට 1.7ක, තොග හා සිල්ලර වෙළෙඳාම සියයට 1.2ක, වැඩසටහන් සම්පාදනය හා ගුවන් විදුලි විකාශන කාර්යයන් සියයට 1.2ක, අනෙකුත් පෞද්ගලික සේවා සියයට 0.7ක, සෞඛ්‍ය සේවා සියයට 0.5ක හා අධ්‍යාපනය සියයට 0.4 ක ලෙස වර්ධන වේගයක් වාර්තා කර තිබේ. 

කෙසේ වෙතත් මෙම පළමු කාර්තුව තුළ “රාජ්‍ය පරිපාලන“ ක්‍රියාකාරකම්වල පෙන්නුම් කර ඇත්තේ සියයට 2.9ක ඍණ වර්ධනයකි. 

මේ අතර 2025 පළමු කාර්තුව තුළ මෙරට දළ දේශීය නිෂ්පාදිතය සඳහා සේවා අංශයේ දායකත්වය සියයට 57.4ක් ලෙස සටහන්ව තිබේ.