භානුක අමරසිංහ

කීල්ස් සුපිරි වෙළෙඳසල් ජාලය 2024/25 මූල්‍ය වර්ෂයේදී රුපියල් බිලියන 124ක ආදායමක් ලැබීමට සමත්ව ඇතැයි පැවසේ. ඒ අනුව මෙය 2023/24 මූල්‍ය වර්ෂයේදී රැස් කරගත් රුපියල් බිලියන 111 ක ආදායම හා සැසඳීමේදී සියයට 12 ක වර්ධනයකි.

කීල්ස් සුපිරි වෙළෙඳ සල් අයත් සිලෝන් කෝල්ඩ් ස්ටෝර්ස් පීඑල්සී සමාගම ඊයේ නිකුත් කළ 2024/25 වාර්ෂික වාර්තාව තුළ මේ පිළිබඳව සඳහන්ව තිබේ. සිලෝන් කෝල්ඩ් ස්ටෝර්ස් පීඑල්සී සමාගම ජෝන් කීල්ස් සමූහයට අයත් පරිපාලිත සමාගමකි.

මෙහිදී එකිනෙකට වෙනස් මිල පරාසයන් යටතේ විවිධාංගීකරණය වූ නිෂ්පාදන පෙළක් ඉදිරිපත් කිරීමට හැකියාව ලැබීම සහ භැංමි ලෝයල්ටි වැඩසටහන හරහා පාරිභෝගිකයාට වාසි සැලසීම මෙන්ම නවීනතම දත්ත විශ්ලේෂණ වැඩසටහන් හරහා පාරිභෝගික කැමැත්ත ගැඹුරින් තේරුම් ගැනීමට කටයුතු කිරීම යනාදිය හේතුවෙන් ඇති වූ පාරිභෝගික පැමිණීම් ඉහළ යෑම මෙලෙස ආදායම් වර්ධනයට හේතුව වූ බව සිලෝන් කෝල්ඩ් ස්ටෝර්ස් පීඑල්සී හි සභාපති ක්‍රිෂාන් බාලේන්ද්‍ර මහතා මෙම වාර්තා වෙත අදහස් දක්වමින් පවසා සිටියි.

එහි සඳහන් ආකාරයට පසුගිය වසර තුළදී අලු‍තින් වෙළෙඳසල් 6ක් විවෘත කිරීමට හැකියාව ලැබී ඇති අතර, 2025 මාර්තු 31 වනවිට සමස්ත අලෙවිසල් සංඛ්‍යාව 138ක් දක්වා ඉහළ නංවාගැනීමටද ඔවුන් සමත්ව තිබේ. “ඉදිකිරීම් පිරිවැයෙහි සිදු වූ අඩුවීම මෙලෙස ආයෝජන පුළුල් කිරීමට සහයෝගයක් දැක්වුවා. යාපනයේ විවෘත කළ කීල්ස් සුපිරි වෙළෙඳසල අපගේ ව්‍යාපාරයේ සුවිශේෂ සන්ධිස්ථානයක්.“ බාලේන්ද්‍ර මහතා පවසයි.

අද වනවිට කීල්ස් සන්නාමය යටතේ අලෙවි කරන නිෂ්පාදන සංඛ්‍යාව 353ක් දක්වා ඉහළ දමා තිබෙන අතර, නිෂ්පාදන වර්ග 92ක් යටතේ ඒවා ඉදිරිපත්ව තිබෙන බවත් සඳහන් වෙයි. එසේම ඍජු ආනයන වෙත පිවිසීම සහ ශක්තිමත් සැපයුම් දාම කළමනාකරණ හරහා වඩාත් ආකර්ෂණීය මිලකට පාරිභෝගිකයාට භාණ්ඩ ලබාදීමට කටයුතු කරන බවත් සභාපතිවරයා මෙහිදී සඳහන් කරයි.

මෙම 2024/25 මූල්‍ය වර්ෂයේදී සිලෝන් කෝල්ඩ් ස්ටොර්ස් පීඑල්සී සමූහය රුපියල් මිලියන 157.9ක සමස්ත පිරිවැටුමක් වාර්තා කිරීමට සමත්ව ඇති අතර, එය 2023/24 වසරේදී වාර්තා කළ රුපියල් බිලියන 139.6 හා සැසඳීමේදී සියයට 13ක වර්ධනයකි.