(හර්ෂණ තුෂාර සිල්වා)

මෙරට අපනයන ආදායම වැඩි කිරීමේ අරමුණින් සහ ‘කොවිඩ්-19’ වයිරස වසංගතයෙන් මෙරට අපනයන කර්මාන්තයට එල්ල වී තිබෙන බලපෑම අවම කිරීමේ අරමුණින් ශ්‍රී ලංකා අපනයන සංවර්ධන මණ්ඩලය සහ විදේශ සබඳතා අමාත්‍යාංශය ඒකාබද්ධව පියවර රැසක් ගෙන ඇත.

නව වෙළෙඳපොළ අවස්ථා හඳුනාගැනීම, වෙළෙඳපොළ සම්බන්ධයෙන් තොරතුරු බෙදාහරිමින් දැනුවත් බව ඇති කිරීම, සැපයුම්දාම ගැටලු විසඳුම් ලබාදීම සහ අන්තර්ජාලය හා විඩියෝ තාක්ෂණය භාවිත කරමින් ධාරිතා හා හැකියා සංවර්ධනය වැඩිදියුණු කිරීම සහ දැනට සිටින අපනයනකරුවන්ට තම අපනයන සිදු කිරීම සහාය ලබාදීම සඳහා ව්‍යාපාරික සබඳතා නිර්මාණය කිරීම එම පියවර ඇතුළත් බව ශ්‍රී ලංකා අපනයන සංවර්ධන මණ්ඩලය සහ විදේශ සබඳතා අමාත්‍යාංශය ඒකාබද්ධ නිවේදනයක් නිකුත් කරමින් සඳහන් කරයි.

‘‘එක් ගම්මානයක් - එක් නිෂ්පාදනයක්’’ යන සංකල්පය යටතේ ශ්‍රී ලංකාවේ සුළු හා මධ්‍ය පරිමාණ ව්‍යවසායකයන්ට සහාය වීමේ අරමුණ ඇතිව විදේශවල වෙසෙන සංක්‍රමණික ශ්‍රී ලාංකිකයන්ගේ ආයෝජනය ආකර්ෂණය කරගැනීම සඳහා අපනයන සංවර්ධන මණ්ඩලය සහ විදේශ අමාත්‍යාංශය, විදේශවල ශ්‍රී ලංකා දූත මණ්ඩල සමඟ එක්ව කටයුතු කිරීමට ද පියවර ගෙන ඇත.

කොවිඩ්-19 වසංගතයෙන් ශ්‍රී ලංකාවේ ආර්ථිකයට ඇති විය අහිතකර බලපෑම් මඟහරවා ගැනීමටත් ඇමෙරිකානු ඩොලර් බිලියන 10.75ක මේ වසරේ අපනයන ඉලක්කය සපුරා ගැනීමටත් මෙම පියවර ගෙන ඇති අතර රජයේ ආර්ථික අරමුණු සාක්ෂාත් කරගැනීම සඳහා නව අවස්ථා ගවේෂණය කිරීම සහ තාක්ෂණය උපයෝගී කරගැනීම පිණිස අනෙකුත් දේශීය හවුල්කරුවන් මෙන්ම හවුල්කාර රටවල් සහ සංවිධාන සමඟ සමීපව කටයුතු කිරීම සඳහා ද පියවර ගැනීම ද අවධානය යොමු ව තිබේ.