දශක පහක් තිස්සේ කොලොම්බියා රජය සමඟ සටන් වැද සිටින ෆාක් ගරිල්ලන් සමඟ සාම සාකච්ඡා පැවැත්වීමට තමන් සූදානම් යැයි එරට ජනපති යුවාන් මැනුවෙල් සැන්ටෝස් පවසයි. සැන්ටෝස් මේ බව කියා සිටියේ ඊයේ (28) ජනපති මන්දිරයේ සිට ජනතාව අමතමිනි. ගරිල්ලා සටන්කාමීන් සමඟ මීට පෙර අවස්ථා ගණනාවකදී ද කොලොම්බියා නායකයෝ සාම සාකච්ඡා පැවැත්වීමට උත්සහ කළද ඒවා අසාර්ථක විය. ජනපති සැන්ටෝස් පවසන්නේ පසුගිය ජනපතිවරුන් ගත් වැරදි තීරණ නිසා ගරිල්ලන් සහ රජය අතර පැවැති අර්බුදය දිග්ගැස්සුණු බවය. එම වැරදි නිවැරදි කරමින් සාම සාකච්ඡා ආරම්භ කෙරෙන බවත් ෆාක් ගරිල්ලා සංවිධානයෙන් ද ඊට කැමැත්ත පළ වී ඇති බවත් ජනපති සැන්ටෝස් වැඩිදුරටත් කියා සිටී. ගරිල්ලන් සමඟ සාකච්ඡා පැවැත්වීමට ජනපති සැන්ටෝස් තීරණය කළේ අසල්වැසි ලතින් ඇමෙරිකා නායකයන් වන වෙනිසියුලා නායක හියුගෝ චාවේස් සහ කියුබාවේ හිටපු නායක ෆිදෙල් කස්ත්‍රෝ හමුවී ඒ ගැන සාකච්ඡා කිරීමෙන් ද පසුවය.