ෆින්ලන්ත අගමැති ජරිකී කටයිනන් පෙරේදා (22) එරට ටුරූකු නගරයේ දී එක්තරා පුද්ගලයකුගේ පිහි ප‍්‍රහාරයකින් අනූ නවයෙන් දිවි ගලවා ගත්තේය. අගමැතිවරයා එම සිද්ධියට මුහුණ දුන්නේ ලබන ඉරිදාට යෙදෙන නගරසභා මැතිවරණයේ ඡන්ද කටයුතුවල නියැළී සිටියදීය. අගමැතිවරයා ජනතාව හමුවෙද්දී හිටිහැටියේම පිහියක් අතින් ගත් තැනැත්තකු ඔහුට පහර දීමට පැමිණි බවත් ආරක්ෂක අංශ වහා මැදිහත් වී එම පුද්ගලයා යටත් කර ගත් බවත් විදෙස් පුවත් සේවා වාර්තා කරයි. අගමැතිවරයාට එසේ පහර දීමට තැත් කළේ ඇයි ද යන්න පිළිබඳ දිගින් දිගටම පරීක්ෂණ පැවැත්වෙන බව පොලිසිය පවසයි. සිදුවීමෙන් පසුව ද අගමැතිවරයා ජනතාව හමුවී ඡන්ද කටයුතුවල නියැළුණු බව වාර්තා විය. 41 හැවිරිදි අගමැති ජරිකී කටයිනන් එරට ජාතික සන්ධාන පක්ෂයේ නායකයා ද වෙයි. ඔහු යුරෝපාවාදියකු වන අතර ඉතා ජනපි‍්‍රය නායකයෙකි. ලබන ඉරිදා පැවැත්වෙන නාගරික මැතිවරණයෙන් ජරිකී කටයිනන්ගේ පක්ෂයට විශිෂ්ට ජයක් හිමි වනු ඇති බව ජනමත සමීක්ෂණවලින් ද හෙළි වී තිබේ.