ඉන්දියාවේ හයිද්‍රාබාද් නුවර මුඩුක්කු සංකීර්ණයක පෙරේදා (18) හදිසියේ හටගත් මහා ගින්නකින් පුද්ගලයන් හත් දෙනකු මියගිය අතර 100 කට වැඩි පිරිසක් තුවාල ලැබූහ. ගින්න හටගත්තේ හයිද්‍රාබාද් නුවර සිට කිලෝ මීටර් 30 ක් දුරින් පිහිටි මුඩුක්කුවකය. මුඩුක්කුවේ තාවකාලිකව අටවා ගත් පැල්පත්වල ජීවත් වූයේ බිහාර්, බටහිර බෙංගාලය, ආන්ද්‍රා ප‍්‍රදේශ් ආදී ප‍්‍රාන්තවල ඉදිකිරීම් කටයුතුවලට සම්බන්ධ කම්කරුවන් සහ ඔවුන්ගේ පවුල්වල සාමාජිකයන්ය. ගින්න ඉක්මනින් පැතිර ගිය බවත් එය නිවා දැමීමට ගිනි නිවන හමුදාව දැඩි පරිශ‍්‍රමයක් දැරූ බවත් ඉන්දීය එන්.ඞී.ටී. පුවත් සේවා වාර්තා කරයි. ගින්න හටගත් අවස්ථාවේදී ගිනි නිවන හමුදා භටයන් පැමිණීමට පෙර ගින්න නිවා දැමීමට උත්සාහ කළ පිරිස් ගින්නට හසුවී බරපතළ ලෙස තුවාල ලැබූ අතර ඔවුන් කඩිනමින් රෝහල් ගත කර ඇත. මියගිය අය අතර කුඩා දරුවන් දෙදෙනකු සහ කාන්තාවන් දෙදෙනකු සිටින බව පොලිසිය පවසයි. පිළිස්සුම් තුවාල ලැබූවන් කිහිප දෙනකුගේ තත්ත්වය බරපතළ බවත් මියගිය ගණන තවත් ඉහළ යා හැකි බවත් රෝහල් ආරංචි මාර්ග වැඩිදුරටත් කියා සිටියි. ගෑස් කාන්දුවක් නිසා ගින්න හට ගෙන ඇතැයි සිදුකළ පරීක්ෂණවලින් හෙලි වූ බව ගිනි නිවන භටයෝ පවසති. ගින්නට බිලිවූ දරුවන්ගේ වියෝව දරාගත නොහැකිව වැළපෙන මවක්