මියන්මාර පාර්ලිමේන්තුව ඊයේ (23) රැස්වූ අතර පසුගියදා පැවැති අතුරු මැතිවරණයෙන් ජය ගත් එරට විපක්ෂ නායිකා අවුන් සාන් සූ කී සහ ඇගේ ප‍්‍රජාතන්ත‍්‍රවාදී පක්ෂ මන්තී‍්‍රවරු එය වර්ජනය කළහ. සූ කී සහ ඇගේ ප‍්‍රජාතන්ත‍්‍රවාදී පක්ෂ මන්තී‍්‍රවරු පවසා ඇත්තේ හමුදා පාලකයන්ගේ රූකඩයක් වූ මියන්මාර සිවිල් රජය යටතේ කටයුතු කිරීමට තමන් කිසිසේත් සූදානම් නැති බවය. වසර 20 කට ආසන්න කාලයක් නිවාස අඩස්සියේ සිට නිදහස ලැබීමෙන් පසු සූ කී සහ මියන්මාර සිවිල් රජය අතරේ ගැටුමක් ආරම්භ වූ ප‍්‍රථම අවස්ථාව මෙයයි. මියන්මාරයේ හමුදා පාලනය අවසන් වූයේ 2010 වසරේ පැවැත්වුණු මහ මැතිවරණයෙන් පසුවය. එම මැතිවරණයෙන් ජයග‍්‍රහණය කළේ ද හමුදා පාලකයන්ට හිතවාදී දේශපාලන පක්ෂය. කෙසේ නමුත් එම පක්ෂ එක්වී පිහිටුවූ සිවිල් රජය නව දේශපාලන ප‍්‍රතිසංස්කරණ ද හඳුන්වා දුන් අතර ඒවා විදේසවල ප‍්‍රශංසාවට ද ලක් විය. අවුන් සාන් සූ කී ඉදිරිපත් වී ජයග‍්‍රහණය කළ අතුරු මැතිවරණය පැවැත්වුණේ ද එම දේශපාලන ප‍්‍රතිසංස්කරණ යටතේය.