කළු සල්ලි ජාවාරම වැළැක්වීමේ අරමුණින් ඉන්දියාවේ රුපියල් 500 සහ 1000 නෝට්ටු තහනම් කිරීමට එරට රජය ගත් පියවරට විරෝධය පළ කරමින් ඉන්දියාව පුරා අද (28) විරෝධතා පැවැත්විණි.

කල්කටා, කේරළ හා බැංග්ලෝර් ප්‍රාන්තවල වැසියෝ දහස් ගණනක් වීදි බැස උද්ඝෝෂණවල යෙදුණහ. එරට විපක්ෂය මෙම විරෝධතා සංවිධානය කැර තිබිණි.

හිටපු අගමැති මන්මෝහන් සිං ද වත්මන් අගමැති මෝදි ප්‍රමුඛ රජය ගත් මෙම තීරණය විවේචනය කළේය. නමුත් මෝදි සඳහන් කරනුයේ තමන් ඇතුළු රජය ගත් මෙම තීරණය ඉතා වැදගත් මෙන්ම නිවැරදි එකක් වන බවයි.

මෝදිගේ තීරණය සම්බන්ධයෙන් ඔහු සමාව ගත යුතු බව කියමින් විපක්ෂය පසුගිය සතියේ ඉන්දීය පාර්ලිමේන්තුවේ නැගී සිටිමින් විරෝධය ප්‍රකාශ කළේය.

නමුත් එරට ඇතැම් ප්‍රාන්තවල මහ ඇමැතිවරුන් මෙන්ම ජනයාද මෝදිගේ තීරණය හොඳ එකක් බව කියති.