සිරියාවේ නායක බෂාර් අල් අෂාඩ් පවුලට අයත් ප‍්‍රංශයේ පැරීස් නුවර පිහිටි වර්ග මීටර 788ක් පමණ වූ ඉඩමක් පසුගියදා  ප‍්‍රංශ රජය විසින් පවරා ගන්නා ලදී. පැරීසියේ කලාප අංක 16 ලෙස සැලකෙන භූමි ප‍්‍රමාණය ලෝකයේ බොහෝ රටවල ධන කුවේරයන්ගේ පරාදීසයකි.

මෙම කලාපය ඉතාමත්ම මිල අධික ප‍්‍රදේශයක් ලෙස ලෝකයේම ප‍්‍රසිද්ධය. පැරීසියේ පෞරාණික සිද්ධස්ථාන බොහෝමයක් මෙම වපසරිය තුල පිහිටා තිබීම එයට හේතුවයි. එබැවින් බොහෝ රටවල රාජ්‍ය නායකයන්, ධන කුවේරයන්, රජවරු ,කුමරු, කුමරියන් සතු ඉඩකඩම්, නිවාස බොහෝමයක් මෙම ප‍්‍රදේශයෙන් මිලදී ගෙන ඇත්තේය. එලෙස මිලයට ගත් ඉහත වර්ග ප‍්‍රමාණයට අයත් භූමි භාගයක් සිරියාවේ බෂාර් අල් අෂාඞ් පවුලටද ඇත්තේය.

පසුගියදා පැරීසියේ නගර සභා නියෝජිත සභා වාරයකදී ඉහත ඉඩම පවරා ගැනීමේ යෝජනාවක් සියලූ දෙනාගේ කැමැත්තෙන් සභා සම්මතවූ අතර ඉන්පසු සිදුකළ අධිකරණ ක‍්‍රියාවලියකින් පසු ඉහත ඉඩම රජයට පවරා ගැනීම සිදුවිය. ඒ අනුව වාහන 14කට ඉඩ පහසුකම් ඇති රථ වාහන ගාලක් සමඟ ළදරු පාසැලක් ඉදි කිරීමට පැරිස් නගර සභාව සැලසුම් කොට ඇත. වර්ෂ 2020 දී එම ඉදිකිරීම් අවසන් වීමට නියමිතය.

මහජන උද්ඝෝෂණ ඉදිරියේ රටින් පලා ගිය ටියුනිසියානු හිටපු නායක බෙන් අලී පවුලට හා ලිබියාවේ හිටපු නායක කර්නල් ගඩාෆිට අයත් නිවෙස් හා ඉඩම් පසුගිය වසරේදී මෙලෙසම රජයට පවරා ගන්නා ලදී. තම රටේ රාජ්‍ය ධනය සොරකම් කොට ලබා ගත් මෙවැනි දේපොල පැරීසියේ තවත් ඇති අතර ඔවුන්ගේ රටවල සිදුවන දේශපාලන වෙනස්වීම් වලට සාපේක්ෂව ප‍්‍රංශ රජය විසින් එම දේපොලද ඉදිරියේදි පවරා ගැනීමට බොහෝ ලෙස ඉඩ කඩ පවතින බව ඉහත සිද්ධීන් සනාථ කරයි.

සමහර රටවල ඒකාධිපති පාලකයන්ට අයත් මෙවැනි දේපොල විකුණා එම මුදල් එම රට වලට ලබා දෙන බව ප‍්‍රංශය පැවැසුවද මෙතෙක් එවැන්නක් සිදුවූ බවක් නම් දැන ගැනීමට නොමැත.