සිරියාවේ හෝම්ස් නගරයේ යුද ගුවන් තොටුපළකට මිසයිල ප්‍රහාරයක් එල්ල වී ඇතැයි වාර්තා වේ. හෝම්ස්හි ට්‍රයිෆොර් ගුවන් කඳවුරේ  ගුවන් ආරක්ෂණ පද්ධතිය සක්‍රීය වූ බව බලධාරීහු පවසති.

 

එම ප්‍රදේශයෙන් විශාල පිපිරුම් ශබ්ද ඇසුණු බවත් මිසයිල ප්‍රහාර කිහිපයක් ගුවන් කඳවුරට එල්ලවූ බවත් මාධ්‍ය වාර්තා කර ඇත.

 

ඊයේ (8) සිරියාවේ කැරළිකරුවන් ග්‍රහණයේ පවතින ඩුවෝමා නගරයට දැවැන්ත රසායනික වායු ප්‍රහාරයක් එල්ලවූ අතර එයින් කාන්තාවන් සහ දරුවන් ඇතුළු බොහෝ පිරිසක් මියගිය බව මාධ්‍ය වාර්තා කර තිබිණි.

 

මෙහිදී සිදුවූ දරුණු හානිය සම්බන්ධයෙන් ඇමරිකානු ජනපති ඩොනල්ඩ් ට්‍රම්ප් සිය බලවත් අප්‍රසාදය පල කර තිබූ අතර සිරියානු ජනපති අසාද් දැඩි ලෙස හෙළා දකිමින් මෘගයකු බව පවසා තිබිණි.

 

ඇමෙරිකානු ජනපතිවරයා තවදුරටත් පවසා තිබුණේ සිරියානු රජයට මේ සම්බන්ධව විශාල මිලක් ගෙවීමට සිදුවනු ඇති බවයි.

 

මිසයිල ප්‍රහාරය සම්බන්ධව ප්‍රකාශයක් නිකුත් කරමිනු ඇමෙරිකාව පවසා ඇත්තේ තමන් විසින් සිරියා ගුවන් කඳවුරකට ප්‍රහාර එල්ල කිරීම සම්බන්ධව පැතිරෙන වාර්තා අසත්‍ය බවයි.

 

(බීබීසී ඇසුරිණි - 085)