තමන් උපන්නේත් මැරෙන්නේත් අන් දේශයක නොව සිරියාවේම බව සිරියා ජනපති බෂීර් අල් අසාඩ් කියයි. ඔහු මේ බව පැවැසූයේ රුසියානු රූපවාහිනී නාලිකාවක් හා සම්මුඛ සාකච්ඡාවකට එක් වෙමිනි. බටහිර රටවල් සිරියාවේ ගැටලූවට අතපෙවීම අනවශ්‍ය බව කියන සිරියානු ජනපතිවරයා එසේ කිරීමට තැත් කළහොත් බරපතළ ප්‍රතිවිපාක අත්වනු ඇතැයි අනතුරුද ඇගවයි. බෂීර් අල් අසාඩ් සිරියාව අතහැර පළා එන්නේ නම් ඔහුට ආරක්ෂාව ලබා දීමට තම රජය සූදානම් බව බ්‍රිතාන්‍යය අගමැති ඩේවිඩ් කැමරන් මීට පෙර අවස්ථාවකදී පවසා තිබිණි. බ්‍රිතාන්‍යය අගමැතිවරයාගේ ප්‍රකාශය පිළිකුලෙන් යුතුව බැහැර කරන බෂීර් අල් අසාඩ් තමන් බටහිර ගැති රූකඩයක් නොවන බවද ලිබියාවේ ගඩාෂිට වඩා තමන් ශක්තිමත් බවද කියයි. සිරියානු ජනපතිවරයාගේ මුරණ්ඩු ප්‍රතිපත්තිය හමුවේ බටහිර රටවල් දැන් සිය අවධානය යොමු කර ඇත්තේ සිරියාවේ විපක්ෂය දෙසටය. ඒ ඔවුනට සහය දී හෝ බෂීර් අල් අසාඩ් ගේ රජය පෙරළා දැමීමටයි. එහෙත් විපක්ෂයේ ඇතැම් මත ගැටුම් නිසා ඒ පියවරද සාර්ථක වන බවක් දැනට නොපෙනේ. මාස 19 ක් පුරා සිරියාවේ බෂීර් අල් අසාඩ් ගේ රෙජීම හමුදා හා කැරලිකරුවන් ඇවිලෙන ගැටුම් වලින් මේ වන විට මියගොස් ඇති පුද්ගලයින් සංඛ්‍යාව 38000 කට ආසන්නය.තත්ත්වය තවත් බරපතල කරමින් සිරියාවේ ගැටුම් මුලූ මැදපෙරදිග පුරා ව්‍යාප්ත වීමට තැත් දරන ආකාරයක් දැන් පෙනේ. ලෝක බලවත්හු කළබල වී ඇත්තේ මේ හේතුව නිසාය. (කෝ වි ගු)