සිරියා රජය හමුදා ප‍්‍රහාරක හෙලිකොප්ටර් සහ යුද ටැංකි යොදා ගනිමින් එරට හාමා ප‍්‍රාන්තයේ නගරයකට පෙරේදා (13) එල්ල කළ ප‍්‍රහාරයකින් සිවිල් වැසියන් 200 දෙනකු මියගොස් ඇතැයි සිරියානු මානව හිමිකම් සුරැකීමේ සංවිධාන පවසයි. ප‍්‍රහාරය එල්ල වූයේ ටෙ‍්‍රයිම්සා නමැති නගරයටය. එහි 7,000 ක් පමණ ජනතාවක් ජීවත් වූ බවත් ප‍්‍රහාරයෙන් මියගිය 200 දෙනාගෙන් වැඩි දෙනා කාන්තාවන් සහ කුඩා දරුවන් බවත් සිරියානු මානව හිමිකම් සුරැකීමේ සංවිධානයේ ප‍්‍රධානී රාමී අබ්දෙල් රෙහ්මාන් ඒ.එෆ්.පී. පුවත් සේවයට පවසා ඇත. සිරියා හමුදා එම නගරයට  පහර දී ඇත්තේ රජයට එරෙහිව අවි ගෙන සටන් වදින ‘නිදහස් සිරියානු හමුදාව’ යනුවෙන් හැඳින්වෙන කැරැලිකරුවන්ට නායකත්වය දෙන අබ් මොහොමඞ් සොයමින්ය. කෙසේ නමුත් සිරියා රජයට අයත් ‘සානා’ පුවත් සේවය වාර්තා කර ඇත්තේ සිරියා රජය ‘ත‍්‍රස්තවාදීන්’ සමඟ දරුණු සටනක් සිදුකළ බවය. තමන් එල්ල කළ ප‍්‍රහාරයෙන් සිවිල් වැසියන් මිය නොගිය බවත් මියගියේ අල් කයිඩාවට සම්බන්ධ සටන්කාමීන් බවත් සිරියා රජය කියා සිටී. සිරියාවේ කැරැලිකාර පාර්ශ්වය නියෝජනය කරන දේශපාලන හඬ ‘සිරියානු ජාතික පාලක මණ්ඩලයයි. ඔවුන් එක්සත් ජාතීන්ගේ සංවිධානයට පවසා ඇත්තේ සිරියා ජනපති බෂීර් අල් අසාද්ගේ රජය තවත් සමූල ඝාතනයක් සිදු කර ඇති බවය. මේ අතර ජාත්‍යන්තර මානව හිමිකම් සුරැකීමේ සංවිධානය පවසා ඇත්තේ සිරියා රජය තහනම්කර ඇති  පොකුරු බෝම්බ යොදා ගනිමින් ප‍්‍රහාර එල්ල කරන බවය.