සිය පාකිස්තාන සංචාරය අතරතුරදී සෞදි අරාබියේ ඔටුන්න හිමි සල්මාන් කුමරු ඇෆ්ගන් තලේබාන් සංවිධානයේ නියෝජිතයන් හමු වී සාකච්ඡා පැවැත්වීමට සූදානම් යැයි වාර්තා වේ. 

වසර 17ක් මුළුල්ලේ ඇෆ්ගනිස්තානයේ පවතින සිවිල් යුද්ධය අවසන් කිරීමේ එක් පියවරක් ලෙස එලෙස ඔටුන්න හිමි කුමරු තලේබාන් නියෝජිතයන් හමුවීමට නියමිත යැයි පාකිස්තාන රජයේ ආරංචි මාර්ග සඳහන් කරයි. 

පාකිස්තානය ඇෆ්ගනිස්තානයට සාමය උදා කරදීමේ ක්‍රියාවලියේ සුවිශේෂී කාර්යභාරයක් ඉටු කරයි. පසුගිය මාස කිහිපයේදී ම ඇෆ්ගනිස්තානයට සාමය උදා කරදීම සඳහා සාකච්ඡා පැවැති අතර තලේබාන් සංවිධානයේ නියෝජිතයෝ ඇමෙරිකා එක්සත් ජනපද නිලධාරීන් සමඟ සාකච්ඡා පැවැත්වූහ.

සෞදි අරාබිය ඇතුළු ගල්ෆ් කලාපයේ රටවල් ද එම සාකච්ඡාවලට එක්විය. ඇමෙරිකා එක්සත් ජනපදය මේ වනවිට සිය හමුදා සම්පූර්ණයෙන්ම ඇෆ්ගනිස්තානයෙන් ඉවත් කරගැනීම සම්බන්ධයෙන් අවධානය යොමු කර තිබේ.  

රොයිටර් ඇසුරිනි

055