කාන්තාවන් බල ගැන්වීම සංකේතවත් කරනු වස්, කාටූන් චරිතයක් වන වොන්ඩර් වුමන් කාන්තාවන් බල ගැන්වීම වෙනුවෙන් වන ගරු කටයුතු දුතිකාව ලෙස නම් කිරීමට එක්සත් ජාතීන්ගේ සංවිධානය සැරසේ.

විලියම් මොවුල්ටන් මාර්ස්ටන් නම් කාටූන් චිත‍්‍ර ශිල්පියා අතින් නිර්මානය වූ වොන්ඩර් වුමන් චරිතය ප‍්‍රථම වරට කරළියට පැමිණියේ 1941 වසරේදීය.කාන්තා වීරවරියන් හිඟවූ එදවස කාටූන් ලෝකයේ අත්හදා බැලීමක් ලෙස හඳුන්වාදුන්නද, කිසිවෙකුත් නොසිතූ අයුරින් පේ‍්‍රක්ෂත සිත් ඇද බැද ගැනීමට ඇය සමත් වූවාය.

පසුව ඇයගේ හිමිකාරීත්වය හිමි ඇමරිකාවේ ඞීසී කොමික්ස් චිත‍්‍රකතා සමාගම ඇය වෙනුවෙන්ම වූ චිත‍්‍රකතා මාලාවක්ද ආරම්භ කළේය.

කාන්තාවන් බල ගැන්වීමේ විශේෂ දුතිකාව ලෙස ඇය නම් කිරීමට ප‍්‍රධාන හේතුව වන්නේද, මෙසේ බාධක මැද ඇය පැමිණි ගමනයි.

වොන්ඩර් වුමන් හට මෙම ගරු තනතුර ලබාදීම මෙම මස 21 වැනි දිනට යෙදී ඇත.එදිනම එක්සත් ජාතීන්ගේ ලිංගික සමානාත්මතාව ඇති කිරීමේ සහ කාන්තාවන් බල ගැන්වීමේ ව්‍යාපාරයද ආරම්භ කිරීමට නියමිතය.

කාන්තාවන්ට සහ ගැහැණු දරුවන්ට අධ්‍යාපනයට සමාන අයිතිවාසිකම් තහවුරු කිරීම මගින්, පිළිගත් රැුකියා වල යෙදීමට අවස්ථාව ලබාදීම මගින්, දේශපාලනමය සහ ආර්ථිකමය තීරණ ගැනීමේ කටයුතු වල නියෝජනය තහවුරු කිරීම මගින්, තිරසාර ආර්ථිකයක් ඇති කිරීමට මෙන්ම සමාජය ඇතුළු මුළු මහත් මිනිස් සංහතියේම යහපැවැත්ම තහවුරු කළ හැකි බව එම සංවිධානය පවසයි.