මියන්මාරයේදී අත්අඩංගුවට ගෙන සිරගත කරන ලද රොයිටර් පුවත් සේවයේ මාධ්‍යවේදීන් දෙදෙනා දින 500කට පසු අද (07) යැන්ගොන් අධිකරණයේදී නිදහස් කර ඇත.

මෙලෙස නිදහස් කරනු ලැබුවේ 33 හැවිරිදි වා ලෝන් සහ 29 හැවිරිදි ක්යාව් සෝ ඌ නම් මාධ්‍යවේදීන් දෙදෙනාය.

රෝහින්ග්‍යා අර්බුදය වාර්තා කිරීම සම්බන්ධයෙන් මියන්මාර නිල රහස්‍ය පනත යටතේ චෝදනා ඉදිරිපත් කරමින් මොවුන් දෙදෙනා අත්අඩංගුවට ගෙන තිබුණු අතර යැන්ගුන් නගර ආසන්න බන්ධනාගාරයක සිරගත කරනු ලැබ සිටියහ.

එම චෝදනාවන්ට ඔවුන් වරදකරු බව අධිකරණය විසින් තීන්දු කළ අතර ඔවුන්ට අවුරුදු හතක සිර දඬුවමක් නියම විය.

කෙසේ වුවද මේ සිද්ධියත් සමඟ මියන්මාරයේ මාධ්‍ය නිදහස සහ ප්‍රජාතන්ත්‍රවාදය සම්බන්ධව බොහෝ විවේචන එල්ල විය.

මියන්මාරයට නව වසර උදාවත් සමඟ වාර්ෂික පොදු සමාව යටතේ සිරකරුවන් නිදහස් කරන අතර මාධ්‍යවේදීන් දෙදෙනාට ද එලෙස නිදහස ලැබිණි.

(රොයිටර් පුවත් ඇසුරිනි - 085)