මහ මග ධාවනය කිරීමටත් ඉගිලීමටත් හැකි හෙලිසයිකල් නමැති රෝද තුනක අරුම පුදුම යතුරුපැදියක් වෙළඳ පොළට ඉදිරිපත් කිරීමට බ්‍රිතාන්‍ය සමාගමක් කටයුතු කැර ඇත. පසුගිය වසරේ දී එම යානය එළිදැක්වූ අතර දැන් එය ස්ටර්ලිං පවුම් 230,000ක් හෙවත් රුපියල් පන් කොටි 20 ලක්ෂයකට මිල කරමින් ගැනුම් කරුවන්ට හඳුන්වාදෙමින් තිබේ. රථය මිල කැර තිබේ. පැල්-වී 1 ලෙස නම් කැර ඇති මේ රථය පැයට සැතපුම් 112ක උපරිම වේගයකින් ධාවනය කළ හැකි බව එහි නිපැවුම් කරුවෝ කියති. ධාවනය වෙමින් සිටිය දී ගුවන් ගත කිරීමට අවශ්‍යනම් රථය නවතා විනාඩි 10ක කාලයක දී ගුවන්ගත වීමේ හැකියාව ඇති හෙලිසයිකලයට තත්පර අටක දී උපරිම වේගයට ළඟාවීමේ හැකියාව ඇත.

මහ මග රිය ධාවන බලපත්‍රයක් හා ගුවන් යානා පැදවීමේ බලපත්‍රයක් යන දෙකම මේ රථය පැදවීමට අවශ්‍ය වන අතර එය අඩි 4000 ක උපරිම උසකට නැංවීමේ හැකියාව ද පවතී,

නිෂ්පාදන සමාගම පවසන්නේ අදින් වසර 50ට පමණ පෙරාතුව ඉගිලී යා හැකි කාරයක් පිළිබඳ සංකල්පය මුලින් ම ඉදිරිපත් වූ බවයි. ආසන දෙකකින් සමන්විත හෙලිසයිකලය සඳහා අඩි 540 ක ධාවන පථයක් අවශ්‍යය. ගුවනේ සිට පැමිණ ගුවන්ගත වීමේ ස්විඡය ක්‍රියාවිරහිත කළ විට එහි තටු ඉබේම හැකිලී ගොඩබිම ධාවනයට සුදුසු ආකාරයෙන් රථය සැකසේ.

පෙට්‍රල් භාවිතාකරන මේ රථයේ ගැලුම් 27ක ධාරිතාවකින් යුතු ටැංකියක් ඇති අතර එක් වරක් ඉන්ධන ටැංකිය පිරවූ විට අඩි 4000ක් ඉහළ අහසේ සැතපුම් 220ක් ගමන් කළ හැකි බවත් ගොඩබිම සැතපුම් 750ක දුරක් ධාවනය කළ හැකි බවත් නිෂ්පාදක සමාගම පවසයි.

කාබන් ෆයිබර්, ටයිටේනියම් හා ඇලුමිනියම් යොදා සකසා ඇති හෙලිසයිකලයක බර රාත්තල් 1,499 කි. මේ රථය වාහන තදබදයට කදිම විසඳුමක් බව බොහෝ දෙනකුගේ මතය වී ඇත.