තමා බටහිර රූකඩයක් නොවන බවත්, පාකිස්තානයේ බාලිකාවන්ට අධ්‍යාපනය ලැබීමට ඇති අයිතිය සුරැුකීමට තමා කැපැවී කටයුතු කරන බවත් පාකිස්තාන ජාතික මලාලා යූසොෆ්සායි දැරිය කියා සිටින්නීය.

16 හැවිරිදි මලාලා, මේ බව කියා සිටියේ පෙරේදා (13) ඇමෙරිකානු සංචාරයකින් පසු යළි බි‍්‍රතාන්‍යයට පැමිණ එරට බී.බී.සී. රූපවාහිනිය සමඟ විශේෂ සම්මුඛ සාකච්ඡුාවකට සහභාගී වූ අවස්ථාවේදීය.

ඇතැම් පකිස්තානුවන් මලාලා ‘බටහිර රූකඩයක්’ යැයි හඳුන්වා දී ඇතැයි සාකච්ඡාව මෙහෙයවූ නිවේදකයා මලාලාට පැවැසුවේය.
‘අධයාපනය කියන්නේ අධ්‍යාපනයට. ඒකට බටහිර හෝ නැගෙනහිර කියා භේදයක් නැහැ. මා නැගී සිටින්නේ පාකිස්තානයේ බාලිකා අධ්‍යාපනය වෙනුවෙන්. මා මහන්සි වන්නේ බාලිකාවන්ට අධ්‍යාපනය ලැබීමට ඇති අයිතිය සුරැකීමටයි.” යැයි මලාලා දැරිය පිළිතුරු දෙමින් කියා සිටියාය.

පාකිස්තානයේ බාලිකා අධ්‍යාපනය වෙනුවෙන් හඬ නැගීමේ වරදට තලේබාන් සංවිධානයේ වෙඩි ප‍්‍රහාරයකට ලක්වී දිවි ගලවා ගත් මාලාලා  පසුගිය සතිඅන්තයේ ධවල මන්දිරයේදී ඇමෙරිකා ජනපති බැරැක් ඔබාමා හමුවූවාය.

මලාලා, ධවල මන්දිරයට ගියේ ජනපති බැරැක් ඔබාමාගේ ආරාධනාවකට අනුවය. මාලාලා සහ ජනපති ඔබාමා අතර සුහඳ හමුවක් පැවැත්වුණු අතර, එම අවස්ථාවට ඔබාමා බිරිය මිෂෙල් සහ දියණියෝ දෙදෙනා සාෂා සහ මලීයා ද එක් වූහ.

පසුගිය සතියේ මලාලා අන්තර්ජාතික සම්මාන රැසකින්  ද පිදුම් ලැබුවාය. ඒ ඇය බාලිකා අධ්‍යාපනය වෙනුවෙන් කරන මෙහෙවර ඇගැයීමට ලක් කරමිනි. මෙවර නොබෙල් සාම ත්‍යාගය වෙනුවෙන් ද මාලාලා දැරියගේ නම යෝජනා වී තිබුණු නමුත් සාම ත්‍යාගය ඇයට හිමි නොවිණි.

මලාලා ජීවත් වූයේ පාකිස්තානයේ ස්වාත් මිටියාවතේය. බාලිකා අධ්‍යාපනය වෙනුවෙන් අන්තර් ජාලය ඔස්සේ හඬ නැගීමේ වරදට ඇය තලේබාන් සටන්කාමියකුගේ වෙඩි ප‍්‍රහාරයකට ලක්වූවාය. හිසට වෙඩි වැදී තුවාල ලැබූ මලාලා බි‍්‍රතාන්‍ය රජයේ අනුග‍්‍රහයෙන් බි‍්‍රතාන්‍යයට ගෙනෙණු ලැබුණි. ඇයට වැඩි දුර ප‍්‍රතිකාර ලැබුණේ බි‍්‍රතාන්‍යයේදීය. දැන් ඇය ජීවත් වෙන්නේ බි‍්‍රතාන්‍යයේය.