හමුදා කුමන්ත‍්‍රණයකින් බලයෙන් පහකළ මාලදිවයින් හිටපු ජනපති මොහොමඞ් නෂීඞ්(45) එළඹෙන ජනාධිපතිවරණය සඳහා අපේක්ෂකයකු වශයෙන් ඉදිරිපත් කිරීමට මාලදිවයින් ප‍්‍රජාතන්ත‍්‍රවාදී පක්ෂය තීරණය කර ඇති බව වාර්තා වේ. එම පක්ෂය විසින් මෙම තීරණය ගනු ලැබූයේ 48,000ක් වන පක්ෂ සාමාජිකත්වයෙන් සිදු කළ ඡන්ද විමසීමකට අනුවය. ඡන්දය පැවැත්වීමට පෙර පක්ෂයේ ජ්‍යෙෂ්ඨයන් කියා සිටියේ පක්ෂ සාමාජිකත්වයෙන් සියයට 10ක් නෂීඞ් ජනාධිපති අපේක්ෂකත්වයට කැමැත්ත පළ කළ හොත් ඔහුට ඊට සුදුස්සකු ලෙස පිළිගන්නා බවය. එලෙස ඉකුත් 16 වැනිදා පැවැති ඡන්ද විමසීමේ දී පක්ෂ සාමාජිකයන් 22,000කට වැඩි පිරිසක් නෂීඞ්ට පක්ෂව ඡන්දය ප‍්‍රකාශ කර තිබූ බව පක්ෂ සංවිධායක ඊබ‍්‍රහිම් වහීඞ් සඳහන් කළේය. නෂීඞ්ට විරුද්ධව ඡන්ද ප‍්‍රකාශ කර තිබුණේ ඉතා සුළු පිරිසක් බව ඔහු වැඩි දුරටත් සඳහන් කළේය. මෙම ප‍්‍රතිඵල නිකුත් වූයේ ඡන්ද ගණන් කිරීමේ කටයුතුවලින් අඩක් නිම වූ අවස්ථාවේදීය. ඒ අනුව මොහොමඞ් නෂීඞ් එළඹෙන මාලදිවයින් ජනාධිපතිවරණයට එරට ප‍්‍රජාතන්ත‍්‍රවාදී පක්ෂයෙන් ඉදිරිපත් වන අපේක්ෂකයා ලෙස තේරී පත් වූ බව එම පක්ෂය පවසයි. ඉස්ලාමීය අන්තවාදීන්ගේ සහ එරට ව්‍යාපාරිකයන්ගේ පෙළඹවීම මත 300කගෙන් යුත් හමුදා කණ්ඩායමක් විසින් තමාට ජනාධිපතිධූරයෙන් ඉල්ලා අස්වන්නැයි බල කළ හෙයින් තමා සිය ධූරයෙන් ඉල්ලා අස්වූ බව නෂීඞ් පවසයි. මෙලෙස මාලදිවයින තුළ නිර්මාණය වූ වියවුල් දේශපාලන තත්ත්වය මැඬපැවැත්වීමට සඳහා ජනාධිපතිවරණයක් පවත්වන්නැයි යුරෝපා සංගමය,ඇමෙරිකාව සහ ඉන්දියාව මාලදිවයින් රජයට දන්වා තිබේ.