මීට වසර අටකට ඉහතදී පැරිසියේ හමුදා රෝහලකදී මියගිය පලස්තීන නායක යසර් අරෆත්ගේ මළසිරුර ඊයේ(27) යළි ගොඩගත්තේය. පොදු ජනයාට හෝ මාධ්‍යවේදීන්ට පිවිසිය නොහැකි අයුරින් ආරක්ෂිත ස්ථානයක මිහිදන් කර ඇති පලස්තීන නායකයාගේ මළ සිරුර ගොඩගනු ලැබූයේ ඉතා රහසිගතවය. පලස්තීන නායකයා හෘදයාබාධයකින් මියගිය බව පැවසුණද මෑතකදී සිදු කරන ලද පර්යේෂණයකින් ඔහු ඝාතනය කළේද යන්න පිළිබඳව ආන්දෝලනාත්මක තත්ත්වයක් මතු විය. ඒ අරෆත්ගේ බිරිඳ විසින් ස්විට්සර්ලන්ත පර්යේෂණ කණ්ඩායමකට ඔහු පරිහරණය කළ දෑ පර්යේෂණයට ලක් කිරීම පිණිස ලබාදීමත් සමඟය. පර්යේෂණය අවසානයේදී හෙළි වූයේ ඒවායේ විකිරණශීලී පොලෝනියම් නමැති විෂ රසායනය අන්තර්ගතව තිබූ බවයි. මේ සමඟම අර්ෆත් ඝාතනය කළේ ද යන්න පිළිබඳව සැක මතු වූ අතර ඒ පිළිබඳව සොයා බැලීම ආරම්භ විය. ඉකුත් අගෝස්තු මාසයේදී අරෆත්ගේ බිරිඳ සුහා ප‍්‍රංශ අධිකරණයකින් කළ ඉල්ලීමකට අනුව මෙම පර්යේෂණ කටයුතු ආරම්භ විය. මේ සඳහා පලස්තීන පාලන අධිකාරිය මූලිකත්වය ගෙන කටයුතු කරන අතර ඊට ප‍්‍රංශ, ස්විට්සර්ලන්ත සහ රුසියානු විශේෂඥයන්ගේ සහාය ලැබේ. පලස්තීන නායකයාගේ මළසිරුර ගොඩ ගැනීමෙන් අනතුරුව පර්යේෂණ සඳහා අවශ්‍ය සාම්පල ලබා ගත් අතර හමුදා උත්තමාචාර මැද නැවතත් එම සිරුර මිහිදන් කෙරිණි. යසර් අරෆත්යසර් අරෆත්ගේ සිරුර මිහිදන් කර ඇති ස්ථානය