පකිස්තානයේ කරච්චි නුවර විරෝධතාකරුවන් පිරිසක්  එරට ආරි නම් රූපවාහිනී නාලිකාවේ ගොඩනැගිලි වලට සහ එහි කාර්ය මණ්ඩලයට වෙඩි තබා ඇතැයි එරට මාධ්‍ය වාර්තා කරයි.

වෙඩි තැබීමෙන් එක් පුද්ගලයෙක් මිය ගොස්  කිහිප දෙනෙක් තුවාල ලැබූහ.ප්‍රහාරය මුටාහිඩා ව්‍යාපාරයේ ආධාරකරුවන් පිරිසක් විසින් එල්ල කරන්නට ඇති බව  පොලිසිය සැක කරයි. ඔවුන්  සිදු කළ විරෝධතාවය  ආවරණය නොකිරීම නිසා එම ප්‍රහාරය එල්ල කර ඇති බව සඳහන්ය.

මුටහිඩාවරුන්ට කරච්චි ප්‍රදේශයේ විශාල බලයක් ඇති බව  මාධ්‍ය වාර්තා කරයි. එම ව්‍යාපාරයේ  නායකයකු වන අල්තාෆ් හුසේන් විරෝධතාවයට අණ දුන් බවත් ඉන් විනාඩි දහයක් ඇතුලත සියල්ල සිදු වූ බවත් එම නාලිකාවේ නිලධාරියෙක් ප්‍රකාශ කළේය.   විරෝධතාකරුවන් ඒ අසල පොලිස් මුරපොළකට ද පහර දී ඇත.

ප්‍රහාරයෙන් වාහන කිහිපයක් ද ගිනිගෙන විනාශ වී තිබේ. විරෝධතාවය සාමකාමී ලෙස පැවතුන බවත් පොලිසිය මුලින් වෙඩි තැබූ නිසා විරෝධතාකරුවන් ද වෙඩි තැබූ බවත් මුටාහිඩා හි ප්‍රකාශකයකු මාධ්‍යයට අදහස් දක්වමින් පැවසීය.