නිරිතදිග පාකිස්තානයේ ක්වෙටා නුවර මාර්ගයක් අසල අටවා තිබූ බෝම්බයක් ඊයේ(23) පුපුරා යාමෙන් පුද්ගලයෝ 12 දෙනෙක් ජීවිතක්ෂයට පත්වූහ.
හමුදා භටයන් ප‍්‍රවාහනය කරමින් තිබූ රථයක් ඉලක්ක කරගෙන පුපුරුවා හැරි එම බෝම්බය අටවා තිබුණේ මෝටර් රථයකය. කිලෝ සියයකට අධික බරින් යුතු පුපුරණ ද්‍රව්‍ය යොදා ගෙන බෝම්බය සාදා තිබුණු බව පාකිස්තාන ආරක්ෂක අංශ පවසයි.
බලූකිස්තාන ප‍්‍රාන්තයේ ප‍්‍රධාන නගරය වන ක්වෙටා තලේබාන් ඇතුළු අන්තවාදී සටන්කාමීන්ගේ ප‍්‍රහාර බහුලව එල්ල වන ප‍්‍රදේශයක් ලෙස සැලකේ.
බෝම්බ ප‍්‍රහාරයෙන් මියගිය හා තුවාල ලැබූ බොහෝ දෙනෙක් පොලිස් නිලධාරීහු වෙති. සිද්ධියෙන් 23 දෙනෙක් තුවාල ලැබූහ. ප‍්‍රහාරයේ වගකීම කිසිදු පාර්ශවයක් බාර ගෙන නැත. ආරක්ෂක අංශ සාමාජිකයන් රැුගත් ට‍්‍රක් රථය බෝම්බ ඇට වූ මෝටර් රථය අසළින් ගමන් කරමින් තිබියදී එය දුරස්ථ පාලකයක් ආධාරයෙන් පුපුරුවා හැර ඇත.