කාබුල්හිදීය (රොයිටර්)
ඇෆ්ගනිස්තානයේ නැගෙනහිර නගරයක් වන නන්ගාර්හාර්හි තලේබාන් සහ ඇෆ්ගන් සන්නද්ධ බලකා ඉලක්ක කරගනිමින් එල්ල වූ කාර් බෝම්බ ප්‍රහාරයකින් 26 දෙනෙක් ජීවිතක්ෂයට පත්වූහ. 

තලේබාන් සටන්කාමීන් සහ ඇෆ්ගන් ආරක්ෂක අංශ එක්ව ඊද් අල් ෆිතර් උත්සවය (රාමදාන්) සැමරීම සඳහා එක්ව සිටි අවස්ථාවකදී එම මරාගෙන මැරෙන කාර් බෝම්බ ප්‍රහාරය එල්ල වී තිබේ. ප්‍රහාරය එල්ල වී ඇත්තේ සෙනසුරාදා (16) දිනයේදීය. 

රාමදාන් උත්සවය වෙනුවෙන් තලේබාන් සටන්කාමීන් සහ ඇෆ්ගන් ආරක්ෂක අංශ අතර සටන්විරාම කාලයක් ප්‍රකාශයට පත් කරන ලදි. මීට පෙර කිසිදු අවස්ථාවකදී එවැනි සටන් විරාමයක් ඇති කරගෙන නොතිබිණි. 

අයි.එස් හෙවත් ඉස්ලාමික් ස්ටේට් සංවිධානය ප්‍රහාරයේ වගකීම බාරගත්තේය. ඔවුන්ගේ පුවත් සේවය වන ‘අමාක්’ පුවත් සේවය නිවේදනයක් නිකුත් කරමින් ප්‍රහාරයේ වගකීම බාරගත් අයි.එස් සංවිධානය ඇෆ්ගන් ආරක්ෂක අංශ ප්‍රහාරයේ ඉල්ලකය වූ බව ද සඳහන් කළේය. ප්‍රහාරයට කිසිදු සම්බන්ධයක් නැතැයි තලේබාන් සංවිධානය ඒ අතරවාරයේදී ප්‍රකාශ කළේය. 

රාමදාන් උපවාසය අවසන් කරමින් ඊද් අල් ෆිතර් උත්සවය සැමරීම සඳහා තලේබාන් සටන්කාමීන් ආයුධ අත්හැර කාබුල් අගනුවරට සහ තවත් නගර කිහිපයකට පැමිණ සිටියහ. ඔවුහු ඇෆ්ගන් ආරක්ෂක අංශ එක්වෙමින් එකිනෙකා බදා ගනිමින් ආහාර පානාදිය බෙදාහදාගත් අතර සෙල්ෆි ඡායාරූප ද ගත්හ.  

- 055