තමන් ප්‍රතිකාර කරමින් සිටි රෝගියා මිය යාමෙන් ශෝකයට පත්වූ ඇමරිකාවේ නිව්යෝර්ක් නගරයේ ප්‍රෙස්බිටීරියන් රෝහලේ වෛද්‍යවරයෙකු රෝගියාගේ පවුලේ අය අමතමින් ලියා තැබූ ඇඳ ඉහපත සටහනක් අන්තර්ජාලය පුරා මේ දිනවල ප්‍රචලිතව ඇත. ඒ සටහන මෙසේය,

 

‘මහත්මයාණනි,

ඔබගේ බිරිය හදිසි අනතුරකට පත්ව රෝහල් ගත කළ වේලාවේ ඇයට ප්‍රතිකාර කළ වෛද්‍යවරයා මමයි.ප්‍රතිකාර ලබා දුන්නත් ඇය මියගිය බව මට දැනගන්න ලැබුණා.මේ ලිපියෙන් මා අදහස් කරන්නේ ඇයගේ මරණය වෙනුවෙන් මගේ ශෝකයත් ප්‍රකාශ කිරීමටයි.මා වසර 20 ක් පුරා මේ රෝහලේ හදිසි අනතුරු අංශයේ සේවය කරනවා.මා කිසිදාක මියගිය රෝගියෙකුගේ ඥාතීන් හිතමිතුරන් අමතා ලිපියක් ලියා නැහැ.මොකද හදිසි අනතුරු අංශයේ සේවය කරන වෛද්‍යවරුන්  හැටියට අපට රෝගීන් බොහෝ දෙනෙක් ගැන සැළැකිල්ල යොමු කරන්න වන නිසා.

 

ඒත් මට ඔබගේ බිරිද එක්ක අමුතුම ආකාරයේ බැදීමක් ඇතිවුණා.ඒ හුස්ම ගැනීමට පවා නොහැකිව පීඩා විදිමින් බරපතළ තත්ත්වයක ඉදලත් ඇය සතුටින් සිනාමුසුව සිටි නිසා.තවත් දෙයක්,මට පුදුම හිතුනා ඔබ ඇය කෙරේ දක්වන සැළැකිල්ල දුටුවිට.ඇයට ශක්තියක් වෙමින් ඇය හා සතුටින් කතා කරමින් සිටියා.

ඔබ නිසාම ඇයට දුක් වෙන්න කාරණයක් තිබුණේ නැති තරම්ම වගේ.වෛද්‍යවරයකු හැටියට මා දන්නවා සහකරුවාගෙන් හෝ පවුලේ සාමාජිකයෙකුගෙන් තමන් ලබන ආදරය හා සැළැකිල්ල තරම් මනස සුවපත් කරන තවත් දෙයක් නැති බව.විශේෂයෙන් අදාළ ඔහු රෝගීවූ අවස්ථාවකදී.

මට කනගාටුයි.මේ සියල්ල දරා ගැනීමට ඔබට ශක්තිය ලැබේවායි කියා මා ප්‍රාර්ථනා කරනවා.‘

 

ලිපිය අන්තර්ජාලයට එක් කළ මියගිය කාන්තාවගේ පුත්‍රයා අතැම් අවස්ථාවන්හි හිත් පිත් නැත්තන් සේ හැසිරුණද වෛද්‍යවරුන් යනු මිනිසුන්ම වන බව තමන්ට මේ හා සමාන අත්දැකීම් වලට මුහුණ දුන් පුද්ගලයින්ගෙන් ලත් ප්‍රතිචාර වලින් තේරුම් ගිය බව පවසයි.