අමෙරිකානු ජනපති ඩොනල්ඩ් ට්‍රම්ප් මහතාට එරෙහි දෝෂාභියෝග යෝජනාව එරට නියෝජිත මන්ත්‍රී මණ්ඩලය විසින් විවාදයට ගැනීම ආරම්භ කර තිබේ.

ජනපතිවරයාට එරෙහිව ප්‍රධාන කරුණු දෙකක් මෙහිදී විවාදයට ගැනේ.

බලය අවභාවිත කිරීම දෝෂාභියෝග යෝජනාවේ එක් කරුණක් වන අතර සිය පුද්ගලික ප්‍රතිලාභ පිණිස යුක්රේනයට බලපෑම් කිරීම සම්බන්ධයෙන් ඔහුට චෝදනා එල්ල වී තිබේ.

ඔහුගේ චර්යාව පිළිබඳ විමර්ශන අවහිර කරමින් කොංග්‍රසයට බාධා කිරීම ට්‍රම්ප් මහතාට එල්ල වී ඇති දෙවැනි චෝදනාව වෙයි.

විවාදය පැය කිහිපයක් පැවැත්වීමට නියමිත අතර පසු දිනයේ ඒ සම්බන්ධයෙන් ඡන්ද විමසීම පැවැත්වේ.

නියෝජිත මන්ත්‍රී මණ්ඩලයේ බහුතරයක් සහිත ඩිමොක්‍රටික් පාක්ෂිකයින් ඊට පක්ෂව ඡන්දය දෙනු ඇතැයි අපේක්ෂා කෙරේ.

දෝෂාභියෝගය අනුමත වුවහොත් අමෙරිකානු ඉතිහාසයේ දෝෂාභියෝගයකට ලක්වූ තෙවැනි ජනාධිපතිවරයා බවට ඩොනල්ඩ් ට්‍රම්ප් මහතා පත්වනු ඇත.

හිටපු ඇමරිකානු ජනාධිපතිවරුන් වන ඇන්ඩෘ ජොන්සන් සහ බිල් ක්ලින්ටන් මීට පෙර දෝෂාභියෝගවලට ලක්වූවෝ වෙති.

-226-

(එන්.එච්.කේ. ඇසුරෙනි)