අපේ සෞර ග‍්‍රහ මණ්ඩලයට ඔබ්බෙන් පිහිටා ඇති ග‍්‍රහලෝකයක ජීවය පැවැතිය හැකි බවට සාක්ෂි තමන්ට ලැබී ඇතැයි ඇමෙරිකාවේ නාසා ආයතනය ඊයේ (5) අනාවරණය කළේය.නාසා විද්‍යාඥයන් මේ බව ප‍්‍රකාශ කළේ ඔවුන් විසින් අභ්‍යවකාශයේ රඳවනු ලැබූ ‘කෙප්ලර්’ නමැති අති ප‍්‍රබල දුරේක්ෂයෙන් ලබා ගත් ඡුායාරූප සහ දත්ත පාදක කර ගනිමින්ය. ඔවුන් එම ග‍්‍රහලොව නම් කර ඇත්තේ ‘කෙප්ලර් 22බී’ යනුවෙනි.නාසා විද්‍යාඥයන් කෙප්ලර් දුරේක්ෂය අභ්‍යවකාශයේ රඳවා තිබෙන්නේ ද අපේ සෞර ග‍්‍රහ මණ්ඩලයට ඔබ්බෙන් පිහිටා ඇති ග‍්‍රහලෝකවල ජීවීන් සිටිත්දැයි සෙවීමේ අරමුණ ඇතිවය.නාසා ආයතනය අති නවීන තාක්ෂණයෙන් නිර්මාණය කළ ප‍්‍රබල කැමරාවකින් ද සමන්විත කෙප්ලර් දුරේක්ෂය අභ්‍යවකාශයේ රැඳවූයේ 2009 වසරේදීය. එය ලබන වසරේ එනම් 2012 වසරේ නොවැම්බර් මාසය තෙක් විශ්වයේ ඈත කෙළවරේ ඇති දත්ත සහ ඡුායාරූප පෘථිවියට එවනු ඇත.‘කෙප්ලර් 22 බී’ ග‍්‍රහලෝකයේ ජීවය පවතින බවට සාක්ෂි විද්‍යාඥයන්ට හමුවී ඇත්තේ ඒ අනුවය.‘කෙප්ලර් 22බී’ පිහිටා ඇත්තේ පෘථිවියේ සිට ආලෝක වර්ෂ 600 ක් දුරින් යැයි විද්‍යාඥයෝ පෙන්වා දෙති. මෙම ග‍්‍රහලොව ගැන මුලින්ම තාරකා විද්‍යාඥයන්ට තොරතුරු ලැබී ඇත්තේද 2009 වසරේදීය. පෘථිවියට වඩා විශාල වන මෙම ග‍්‍රහලෝකය අපගේ සූර්යයාට වඩා කුඩා තරුවක් වටේ භ‍්‍රමණය වෙයි. ග‍්‍රහලොවේ ජීවය පැවැතීමට අවශ්‍ය සාධක තිබෙන බවත් එය විශ්වයේ පිහිටා ඇත්තේ ජීවය පැවැතිය හැකි කලාපයක බවත් හෙළි කර ගැනීමට හැකි වී ඇත්තේ කෙප්ලර් දුරේක්ෂයේ උදව්වෙනි.