සොයුස් රොකට්ටුවෙන් ජාත්‍යන්තර අභ්‍යවකාශ මධ්‍යස්ථානය වෙත ගගනගාමීන් තිදෙනකු අද සාර්ථකව ගුවන්ගත කළ බව විදෙස් මාධ්‍ය වාර්තා කර ඇත.

පසුගිය ඔක්තෝබර් මාසයේ ජාත්‍යන්තර අභ්‍යාවකාශ මධ්‍යස්ථානය වෙත ගගනගාමීන් රැගෙන ගිය යානයේ ඇති වූ දෝශයක් හේතුවෙන් හදිසි ගොඩබෑමකට ලක්කිරීමෙන් පසු මෙම ගමන සැලසුම් කෙරිණි.

රුසියාව, ඇමරිකාව හා කැනඩාව නියෝජනය කරමින් මෙම ගගනගාමීන් තිදෙනා කසකස්ථානයෙන් ගුවන්ගත විය.

“අවදානම අපේ වෘත්තියේ අංගයක්, අප මානසිකවත් තාක්ෂණිකවත් මෙම ගුවන් ගතවීමට සූදානම්, එළඹෙන ඕනෑම තත්ත්වයක් අප බාරගන්නවා“ යැයි ගුවන්ගත වීමට පෙර මාධ්‍ය හමුවේ ගගනගාමීහු පවසා සිටියහ.

මෙම චාරිකාව දෙසැම්බර් අවසානයට සැලසුම් කර තිබූ නමුත් ජාත්‍යන්තර අභ්‍යාවකාශ මධ්‍යස්ථානයේ රැඳී සිටි ගගනගාමීන් පෘථිවියට පැමිණීමත් සමඟ එය මිනිසුන් රහිත කළාපයක් බවට පත්වීමේ අවදානමක් මතු වූ හෙයින් වේලාසන ගුවන්ගත කිරීමට සිදුවූ බව බලධාරීහු පවසති.

(බීබීසී ඇසුරිනි - 085)