ගුවනේ දී යානය දුමින් පිරේ

ගුවන්ගත වූ යානයක හදිසියේම ඇති වූ දුමාරයක් හේතුවෙන් එංගලන්තයේ නැගෙනහිර මිඩ්ලන්ඩ් ගුවන්තොටුපොළට ගොඩබැස්වූ බව යුරෝපීය ගුවන් අනතුරු විමර්ෂන ඒකකය පවසයි.

මෙලෙස ගොඩබස්වා ඇත්තේ ඉබිසාවලින් ගුවන් ගත වූ යානයකි. බොයිං 737 වර්ගයේ එල්.එස්.644 නමැති මේ යානය ගුවනේ ගන්කරමින් තිබිය දී හදිිසියේ ම එහි ඇතුලත දුමාරයක් පැතිරගොස් ඇත.

අධික දුඟඳක් සමග දුමාරය පැතිර යද්දී මගීන් දැඩි ලෙස කලබලයට පත්ව කුඩා ළමුන් හඬා වැළපෙමින් සිටි බව එහි ගිය මගීන් පවසා ඇත. මේ සමග නියමුවන් තීරණය කළේ යානය මිඩ්ලන්ඩ් ගුවන්තොටුපොළට හදිසියේ ගොඩබෑ යුතු බවයි. ඒ අනුව ගුවන් තොටුපොළට කරන ලද දැනුම් දීමකට අනුව ඕනෑම හදිසි තත්ත්වයකට මුහුණ දීම සඳහා ගුවන්තොටුපොළ සූදානම් කැරිණි.

මිඩ්ලන්ඩ් ගුවන්තොටුපොළ නිලධාරීන් පවසා ඇත්තේ මේ යානය හදිසියේම ගොඩබස්වන බැවින් ගොඩබැස්සවීමට නියමිතව තිබූ වෙනත් යානා තුනක් බර්මින්ග්හැම් ගුවන්තොටුපොළට හරවා යවා විනාඩි 15 ට ගුවන් පථ වසා දැමූ බවයි.

කෙසේ වෙතත් මේ යානය ගොඩබැස්සවීමට ගත් පළමු උත්සාහය ව්‍යර්ථ විය. දෙවැනි උත්සාහය සාර්ථක විය. යානය ගොඩබස්සන විට ගිනි නිවන හමුදා ඒකක රැසක් ද එහි සූදානම්ව තිබිණි. යානය ගොඩබස්වා නතර කර සැණින් මගීන් එහි දොර විවෘතකර තටුව වෙතට නැග ඇත.

යානයේ ගමන්ගත් මගීන් කිසිවකුට තුවාල සිදු නොවුණි. ගුවන් සේවා බලධාරීන් පවසන්නේ යානයේ සිදුවූ සුළු විදුලි කාන්දුවක් හේතුවෙන් යානයට දුම් පිරී ඇති බවයි. මේ ගැන පුළුල් පරීක්ෂණයක් පවත්වන බව ද බලධාරීන් කියයි.