අප‍්‍රිකානු රාජ්‍යයක් වන කෙන්යාවේ, නයිරෝබී අගනුවර විදෙස් සංචාරකයන් නිතර ගැවසෙන ‘වෙස්ට්ගේට්’ සාප්පු සංකීර්ණ ගොඩනැගිල්ලට, මීට දින කිහිපයකට පෙර එල්ල වූ ත‍්‍රස්ත ප‍්‍රහාරයෙන් පසු, සංචාරක කර්මාන්තය මුළුමනින්ම බිඳ වැටී ඇතැයි, කෙන්යානු සංචාරක අමත්‍යාංශය කියා සිටී.

කෙන්යාව වන රක්ෂිත සංචාරක ආකර්ශනයක් ඇති රටක් වන අතර සෑම වසරකම සංචාරකයන් දහස් ගණනින් කෙන්යාවට පැමිණෙන්නේ සෆාරි යෑමටය.

නයිරෝබී සාප්පු සංකීර්ණ ගොඩනැගිල්ලට එල්ල වුණු අල් ෂෙබාබ් ඉස්ලාමීය ත‍්‍රස්තවාදී ප‍්‍රහාරයෙන් පසු, කෙන්යාවට යෑමෙන් වළකින්නැයි බි‍්‍රතාන්‍යය, ප‍්‍රංශය සහ ඇමෙරිකාව වැනි බටහිර රටවල් සිය රට වැසියන්ට දැනුම් දී ඇත.

කෙන්යානු රජය පවසන්නේ, සංචාරක කර්මාන්තය කඩා වැටීම සිදුවුණු බරපතල පාඩුවක් බවත්, රටේ ආරක්ෂක කටයුතු විධිමත් කිරීමට කඩිනම් පියවර ගෙන ඇති බවත්ය.

‘වෙස්ට්ගේට්’ සාප්පු සංකීර්ණ ගොඩනැගිල්ලට එල්ල වූ ප‍්‍රහාරය ගැන විශේෂ පරීක්ෂණයක් පැවැත්වීමට විශේෂ කමිටුවක් ද පත් කර තිබේ.

අල් ෂෙබාබ් ඉස්ලාමීය ත‍්‍රස්තවාදීහු, ‘වෙස්ට්ගේට්’ සාප්පු සංකීර්ණ ගොඩනැගිල්ලට කඩා වැදී සිව් දිනක්, ඒ තුළ සිටි මුස්ලිම් නොවන පිරිස් ප‍්‍රාණ ඇපයේ රඳවාගෙන සිටියහ. කෙන්යානු ආරක්ෂක අංශ සාමාජිකයෝ, ඔවුන් මුදා ගැනීමට උත්සහ කළහ. එම ‘ඛේදවාචකය’ අවසන් වූයේ, 67 දෙනකුට මරු කැඳවමිනි. ඒ අතර විදේශිකයෝ 18 දෙනෙක් සිටිති.

අල් ෂෙබාබ් යනු අල් කයිඩාව සමඟ සමීප සබඳතා පවත්වන, ඉස්ලාමීය දැඩිමතධාරී සන්නද්ධ කල්ලියකි. ඔවුන් බිහි වූයේ කෙන්යාවේ අසල්වැසියා වන සෝමාලියාවෙනි. ඉන්පසු ඔවුන් කෙන්යාවට ව්‍යාප්තවිය සෝමාලියා රජය අස්ථාවර වී ඇති හෙයින්, ඔවුන්ට සහාය දක්වමින්, කෙන්යානු රජය කෙන්යාවේ හමුදා බලඇණි සෝමාලියාවට යවා ඇත. ඒ, අල් ෂෙබාබ් සටන්කාමීන් සමඟ සටන් වැදීමටය.
අල් ෂෙබාබ් සටන්කාමීන් කණ්ඩායමක්, ‘වෙස්ට්ගේට්’ සාප්පු සංකීර්ණ ගොඩනැගිල්ලට කඩා වැදී පහර දෙමින් ප‍්‍රාණ ඇපකරුවන් රඳවා ගනිමින්, කෙන්යානු රජයට බල කළේ එම හමුදා බලඇණි ආපසු ගෙන්වා ගන්නා ලෙසටය.